აშშ-ის პრეზიდენტმა, დონალდ ტრამპმა თვითმფრინავის ბორტზე ჟურნალისტებთან საუბრისას გრენლანდიის სტრატეგიულ მნიშვნელობაზე გაამახვილა ყურადღება და კიდევ ერთხელ დაადასტურა ვაშინგტონის ინტერესი კუნძულის მიმართ. პრეზიდენტმა აღნიშნა, რომ დანია რეგიონში უსაფრთხოების სათანადო დონეს ვერ უზრუნველყოფს.
„გრენლანდიაზე დაახლოებით ორ თვეში ვიფიქრებთ… გრენლანდია ეროვნული უსაფრთხოების კუთხით გვჭირდება. ის ძალიან სტრატეგიულია… გრენლანდია გვჭირდება ეროვნული უსაფრთხოების თვალსაზრისით და დანია ამას ვერ შეძლებს. იცით, რა გააკეთა დანიამ ცოტა ხნის წინ გრენლანდიაში უსაფრთხოების გასაძლიერებლად? მათ კიდევ ერთი ძაღლების მარხილი დაამატეს“, – განაცხადა ტრამპმა.
მანამდე დანიის პრემიერ-მინისტრმა, მეტე ფრედერიკსენმა მოუწოდა ამერიკის შეერთებულ შტატებს, შეწყვიტოს „თავისი ისტორიული მოკავშირის მიმართ მუქარა“. მისი თქმით, აბსოლუტურად აბსურდულია იმის თქმა, რომ შეერთებულმა შტატებმა გრენლანდიაზე კონტროლი უნდა დაამყაროს.