უნგრეთის პრემიერ-მინისტრმა ვიქტორ ორბანმა უნგრელებს მოუწოდა, 2026 წლის არჩევნებში ხმა მისცენ მის პარტიას, რათა ქვეყანა ომში არ აღმოჩნდეს ჩათრეული. ამ თემას მან Facebook-ის საკუთარ გვერდზე გამოქვეყნებულ პოსტი მიუძღვნა.
„წლის პირველ დღეებში მივიღეთ მნიშვნელოვანი შეხსენება იმისა, რომ ლიბერალური მსოფლიო წესრიგი იშლება. პრეზიდენტ ტრამპის არჩევა მისთვის სასიკვდილო დარტყმა გახდა“, – დაწერა ორბანმა.
მან დასძინა, რომ ახალი სამყარო ჯერ კიდევ „ჩამოყალიბების პროცესშია“, ამიტომ უნგრელებს„უფრო არასტაბილური, არაპროგნოზირებადი და სახიფათო წლები“ ელით.
„ამ ვითარებაში უნგრელმა ხალხმა აპრილში გზა უნდა აირჩიოს. ერთი გზა ბრიუსელის ჩიხისკენ მიდის. მას „ტისა“ (ოპოზიციური პარტია) წარმოადგენს. მხარზე რამდენიმე წამორტყმისა და იმუნიტეტის სანაცვლოდ, ისინი ბრიუსელთან გარიგებებს დათანხმდებიან და მათ ყველა მოთხოვნას შეასრულებენ. ისინი იტყვიან „დიახ“ ომზე, უკრაინის დაფინანსებაზე, მიგრანტების ჩასახლებასა და გენდერულ პროპაგანდაზე“, – განაცხადა ორბანმა.
ამის საპირწონედ პრემიერი საკუთარ პარტიას „ფიდესს“ აყენებს, რომელიც, მისი თქმით, უნგრელებს მშვიდობისა და უსაფრთხოების გზას სთავაზობს.
„ჩვენ არ გვსურს უნგრელი ახალგაზრდების ფრონტზე გაგზავნა და არ გვსურს ქვეყნისა და უნგრეთის ეკონომიკის დანგრევა. ჩვენ გვაქვს გეგმა და განზრახვა, რომ უნგრეთი ჩვენ წინაშე არსებული ისტორიული ეპოქის გამარჯვებულად ვაქციოთ. ამისთვის ჩვენ, უპირველეს ყოვლისა, ომს მიღმა უნდა დავრჩეთ. ამისთვის ვთხოვთ უნგრელ ხალხს, მოგვცეს უფლებამოსილება 2026 წელს“, – დაამატა ორბანმა.