დონალდ ტრამპის თავდასხმამ ვენესუელაზე და ნიკოლას მადუროს დაკავებამ გაამწვავა შიში გრენლანდიაში შესაძლო შეჭრის თაობაზე, – წერს ესპანური გაზეთი El País-ი.
„აშშ-ის პრეზიდენტმა, რომელმაც საერთაშორისო სამართლის მიმართ მცირე პატივისცემა გამოავლინა ვენესუელაში განხორციელებული ქმედებებით – სადაც მან განაცხადა, რომ ამ ეტაპზე ქვეყნის „მართვას“ აპირებს და ნავთობის სექტორში ჩარევა სურს – თვალი დაადგა ამ სტრატეგიულ კუნძულს. გრენლანდია დანიის სამეფოს [ევროკავშირისა და ნატოს წევრი ქვეყანა] დაქვემდებარებული ავტონომიური ტერიტორიაა. ტრამპმა, რომელიც იშვიათი წიაღისეულით მდიდარი და გეოგრაფიულად უმნიშვნელოვანესი გრენლანდიის ხელში ჩასაგდებად ძალის გამოყენებითაც კი იმუქრებოდა, ბოლო კვირების განმავლობაში ყურადღება სწორედ ამ კუნძულისკენ მიმართა“, – ნათქვამია სტატიაში.
ამ კვირას, გამოცემა The Atlantic-თან ინტერვიუში, ტრამპმა კიდევ ერთხელ დაადასტურა, რომ მას კუნძულის ხელში ჩაგდება სურს.
„ჩვენი უსაფრთხოებისთვის გრენლანდია უდავოდ გვჭირდება“, – განაცხადა მან.
მისმა მორიგმა მუქარამ დანიის მთავრობა აღაშფოთა. დანიის პრემიერ-მინისტრმა, მეტე ფრედერიკსენმა ამერიკის პრეზიდენტს დაშინების შეწყვეტა მოსთხოვა.
„არავითარი აზრი არ აქვს საუბარს იმაზე, რომ შეერთებულ შტატებს გრენლანდიის დაუფლება სჭირდება. აშშ-ს არ აქვს უფლება მოახდინოს დანიის სამეფოს შემადგენლობაში შემავალი რომელიმე ქვეყნის [გრენლანდია, ფარერის კუნძულები და კონტინენტური დანია] ანექსია“, – ნათქვამია ქვეყნის ლიდერის განცხადებაში.