მეორე დღეა პოლიტიკური განცხადებების თემაა აშშ-ის გადაწყვეტილება, რომელმაც ვენეციის კომისია და კიდევ 65 საერთაშორისო ორგანიზაცია დატოვა. აქედან 31 გაეროს ორგანიზაციაა, რომელიც დემოკრატიის განვითარების, არჩევნების, სამართლის უზენაესობის, კლიმატის და მიგრაციის საკითხებზე მუშაობს.
ვაშინგტონი ინტერესების აცდენასა და თანხების უმიზნო ხარჯვაზე საუბრობს. სახელმწიფო დეპარტამენტის განცხადებით, მილიარდობით დოლარის უცხოურ ინტერესებზე ხარჯვის ეპოქა დასრულებულია. რაც შეეხება ვენეციის კომისიას, შტატები ორგანიზაციის მხრიდან შიდა ჩარევებზე, სუვერენიტეტის შემლახავ და პოლიტიკურ გადაწყვეტილებებზე საუბრობს.
არგუმენტებს იზიარებენ თბილისშიც. მმართველ გუნდში აცხადებენ, რომ კომისია დიდი ხანია პოლიტიკური დავალებების შემსრულებელ ორგანიზაციად იქცა, რომელსაც საქართველოს წინააღმდეგ ინსტრუმენტად იყენებდნენ. შტატების გადაწყვეტილების შემდეგ კი ვენეციის კომისიის დასკვნას პარტიების არა კონსტიტუციურად გამოცხადების პროცესში, ფასი აღარ ექნება.
პარლამენტის იურიდიულ საკითხთა კომიტეტის თავმჯდომარე არჩილ გორდულაძე აცხადებს, რომ მმართველი გუნდის წევრების განცხადებები მართლდება.
“მერამდენე შემთხვევაა, რომ ჩვენი გუნდის წევრების ნათქვამი აშშ-ზე მართლდება ხოლმე. ჩვენ არა ერთხელ ვამხილეთ ვენეციის კომისია, რომ ისინი პოლიტიზირებულ დასკვნებს დებენ. მაშინ, როდესაც ვენეციის კომისია უნდა იყოს სარეკომენდაციო ხასიათის დასკვნის გამცემი ორგანო, ბოლო ხანებში და წლებში აღარ არის ასე და პოლიტიკით გაჯერებული დოკუმენტები დგინდებოდა საქართველოსთან მიმართებაში”, – აცხადებს გორდულაძე.