ნუ დაგვავიწყდება, ქალბატონ მარტა კოსის აღიარება, „შავ ხვრელებს“ ეძებენ, რომ უფრო დიდი დაფინანსება წამოვიდეს საქართველოს მიმართულებით, – განაცხადა ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა ევროკომისიის „ენჯეოებისა“ და მედიისთვის განკუთვნილ დაფინანსებაზე საუბრისას.
„ფული საქართველოსთვისაც არის გათვალისწინებული და ნუ დაგვავიწყდება, ეს აღიარება ქალბატონი მარტა კოსის, რომელმაც პირდაპირ თქვა, რომ „შავ ხვრელებს“ ეძებენ, რომ უფრო დიდი დაფინანსება წამოვიდეს საქართველოს მიმართულებით, მდიდარი „ენჯეოების“ სასარგებლოდ.
ჩვენს საზოგადოებას იმასაც შევახსენებ, რომ რამდენიმე თვის წინ იყო ძალიან სერიოზული სკანდალი ევროკავშირში. დაახლოებით, 10 მლრდ ევროზე იყო საუბარი, რომ თითქოს, კლიმატის ცვლილებისთვის იყო ეს თანხები გამოყოფილი. თუმცა, აღმოჩნდა, რომ ამ თანხის უდიდესი ნაწილი მოხმარდა ლობიზმს.
მეორე მხრივ, ევროკავშირის კონტროლის პალატამ 2021-2023 წლების ხარჯები შეისწავლა და თავად დაადასტურეს, რომ დაახლოებით, 7,5 მლრდ ევროდან 2/3-ს ფიზიკურად ვერ მიაგნეს და იქაც საფუძვლიანი ეჭვია იმასთან დაკავშირებით, რომ ნაცვლად დეკლარირებული მიმართულებებისა ეს თანხაც პირდაპირ პოლიტიკურ დღის წესრიგს მოხმარდა“, – განაცხადა მაჭავარიანმა.