ეს სამარცხვინო ფანტაზიორობა, რასაც ჩვენ გარედან მხარდაჭერილი და მართული ადამიანები დღეს გვიყვებიან, აჩვენებს კიდევ ერთხელ, რომ რამდენად დაბალი წარმოდგენის არიან ქართველ ხალხზე ის ძალები, რომლებიც მათ გარედან მართავენ, – განაცხადა საქართველოს პარლამენტის თავმჯდომარემ შალვა პაპუაშვილმა კითხვის საპასუხოდ უნდა გამოიკითხოს თუ არა პრემიერ-მინისტრი ირაკლი კობახიძე 4 ოქტომბრის საქმეზე.
პაპუაშვილის თქმით, 4 ოქტომბრის დამხობის მცდელობა წარმატებული რომ ყოფილიყო, როგორ აირეოდა ქვეყანა, ყველა ხვდება.
„ეს ხალხი წავიდა არა ხელისუფლების, არამედ ქვეყნის დამხობაზე. იმ სცენარების განხორციელებაზე, რასაც სხვა ქვეყნებში ვუყურებთ. წინა დღეებში, როცა საუბრობდნენ ნეპალზე. ნეპალის სცენარს დაუჭირა მხარი ევროკომისიამ, რომელმაც თქვა, რომ მხარს უჭერს და სოლიდარულია 4 ოქტომბრის შეკრების მიმართ, რომლის გაცხადებული მიზანი იყო ხელისუფლების დამხობა. დღემდე არ მოგვისმენია მათგან ბოდიში ამ მხარდაჭერის გამო.
მათ რომ ჰგონიათ, საქართველოს სახელმწიფო არის სუსტი და მათი შეძახილებით მოხდება ხელისუფლების დამხობა, ეს ასე არ არის და ზუსტად ეს აღმოჩნდა მისთვის სიურპრიზი“, – აღნიშნა შალვა პაპუაშვილმა.