ვსაუბრობთ, თუ როგორ უნდა მოხდეს ახალგაზრდების ჩართულობა კულტურული მემკვიდრეობის დაცვის და ეროვნული იდენტობის შენარჩუნების კუთხით, საგანმანათლებლო პროგრამებზე, ერთობლივ ინიციატივებზე და შევთანხმდით, რომ როგორც გელათის მიმართულებით, ასევე სხვა ეროვნული კულტურული მემკვიდრეობის ძეგლების მიმართულებით გვექნება ერთობლივი ინიციატივები, – განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარემ, მარიამ ლაშხმა უნგრეთში ვიზიტისას.
ლაშხის თქმით, არსებობს ინიციატივა „კულტურული მემკვიდრეობის ძეგლები მშვიდობის უზრუნველსაყოფად“, იუნესკოს ფარგლებში და ამ კუთხით საქართველოს და უნგრეთს საკმაოდ მნიშვნელოვანი საერთო ინიციატივები შეიძლება ჰქონდეს.
„იუნესკოს აქვს საკმაოდ მძლავრი ინსტრუმენტები იმისა, რომ არსებობდეს რეგიონული ჩართულობა და კვლევითი მიმართულებები. ვისაუბრეთ როგორც მათი გამოცდილების შესწავლაზე და საქართველოში ამ გამოცდილების გადმოტანაზე, ასევე ერთობლივ ინიციატივებზე“, – აღნიშნა მარიამ ლაშხმა.
საქართველოს საპარლამენტო დელეგაცია უნგრეთშია. დაგეგმილია დელეგაციის წევრების შეხვედრები, როგორც საკანონმდებლო, ისე აღმასრულებელი ხელისუფლების წარმომადგენლებთან.