„ესენი არიან ჩვეულებრივი „თაღლითების“ პარტია. ის ორი ადამიანიც, ხანდაზმული თაღლითები ყველაზე სწორედ არის შერჩეული მათ მიმართ ეს სახელი“, – ასე შეაფასა ჟურნალისტებთან საუბრისას საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარე ირაკლი კირცხალიამ „ლელოს“ წევრების განცხადება, რომ ანაკლიის პროექტი ჩაძირულია.
ირაკლი კირცხალიას თქმით, ტრაგიკომედიაა, როდესაც განსაკუთრებით „ლელო“, ერთ-ერთი დანაყოფი აკეთებს ანაკლიის პორტთან მიმართებით ასეთ განცხადებას.
„იმ პოლიტიკური მოძრაობის ლიდერშიპი, რომელიც 200 ათას ადგილზე საუბრობდა, წინასაარჩევნოდ ჰპირდებოდა ჩვენს საზოგადოებას და ამ დროს მაშინდელი ქვეყნის ბიუჯეტის მეოთხედს ედავებოდა. ვნახეთ ორივე არბიტრაჟში როგორ დაასრულეს მათ თავიანთი დავა ჩვენი სახელმწიფოს და ბიუჯეტის წინააღმდეგ. ესენი არიან ჩვეულებრივი „თაღლითების“ პარტია. ის ორი ადამიანიც, ხანდაზმული თაღლითები ყველაზე სწორედ არის შერჩეული მათ მიმართ ეს სახელი.
რა თქმა უნდა, მათი მხრიდან როდესაც კეთდება ასეთი განცხადება, უბრალოდ შეურაცხმყოფელია ჩვენი საზოგადოებისთვის იმიტომ, რომ კარგად ვიცით მთელი ქრონოლოგია თუ რა გააკეთეს, რა გაუკეთეს ამ უმნიშვნელოვანეს პროექტს ჩვენი ქვეყნისთვის. ძალიან კარგად ვიცით ქრონოლოგიურად, რა მიდგომა ჰქონდა სახელმწიფოს დაწყების დღიდან, როდესაც ისინი იყვნენ ჩართული ამ ყველაფრის სათავეში და ძალიან კარგად ვნახეთ, თუ როგორ დაასრულეს ის უტიფარი, ცრუ კამპანია არბიტრაჟებში, თუ რა დაეკისრათ მათ სახელმწიფოს წინააღმდეგ. ერთია, რა დაეკისრა ბიუჯეტის წინააღმდეგ, მეორეა მათი მორალური მხარე, მორალური შეფასება, რაც გააკეთა საზოგადოებამ. ეს ყველასთვის ღიაა, ეს ყველასთვის ნათელია“, – აღნიშნა ირაკლი კირცხალიამ.