ამერიკა და კანადა მოაგვარებენ ონტარიოსა და მიჩიგანს შორის მშენებარე 4.7 მილიარდი დოლარის ღირებულების ხიდის საკითხს, რომლითაც აშშ-ის პრეზიდენტი დონალდ ტრამპი უკმაყოფილოა, – ამის შესახებ კანადის პრემიერ-მინისტრმა, მარკ კარნიმ განაცხადა.
როგორც კარნიმ აღნიშნა, ის ტრამპს სხვადასხვა საკითხზე, მათ შორის გორდი ჰოუს საერთაშორისო ხიდზეც ესაუბრა.
„სიტუაცია მოგვარდება“, – განაცხადა კანადის პრემიერმა, თუმცა დეტალები არ დაუკონკრეტებია.
მარკ კარნის განცხადებით, მიუხედავად იმისა, რომ გორდი ჰოუს საერთაშორისო ხიდის მშენებლობა კანადამ დააფინანსა, ის ამერიკა-კანადის ერთობლივი საკუთრებაა.
„მე მას ავუხსენი, რომ კანადამ ხიდის მშენებლობისთვის ოთხ მილიარდ დოლარზე მეტი გადაიხადა, თუმცა საკუთრება მიჩიგანის შტატსა და კანადის მთავრობას შორის იყოფა“, – აღნიშნა კანადის პრემიერმა.
გორდი ჰოუს საერთაშორისო ხიდის მშენებლობა კანადამ დააფინანსა, რადგან აშშ-მა თანხის გადახდაზე უარი თქვა. ხიდის გახსნა მომდევნო თვეებში იგეგმება, მისი მშენებლობის ხარჯები კი 30 წლის განმავლობაში გადასახადებიდან დაფინანსდება.
როგორც „როიტერი“ წერს, მიჩიგანის ბიზნესჯგუფი მშენებარე ხიდს ამ თაობის ყველაზე მნიშვნელოვან ინფრასტრუქტურულ პროექტს უწოდებს და აცხადებს, რომ მისი დაბლოკვის ნებისმიერ მცდელობას, როგორც შტატისთვის, ისევე ქვეყნისთვის, უაღრესად უარყოფითი შედეგები მოჰყვება.
ცნობისთვის, აშშ-ის პრეზიდენტმა, დონალდ ტრამპმა სოციალურ ქსელში დაწერა, რომ აშშ დაუყოვნებლივ დაიწყებდა მოლაპარაკებებს კანადასთან იმის შესახებ, გასცენ თუ არა ნებართვა გორდი ჰოუს საერთაშორისო ხიდის მშენებლობისთვის. ტრამპის თქმით, ვიდრე შეერთებული შტატები სრულად არ მიიღებს კომპენსაციას ყველაფრისთვის, რაც კანადას მისცა და ასევე, ვიდრე კანადა არ მოეპყრობა შტატებს სამართლიანობითა და პატივისცემით, მათ ხიდის გახსნის უფლებას არ მისცემს.