ავსტრიის, ჩეხეთისა და სლოვაკეთის ლიდერები ევროკავშირს ელექტროენერგიის ფასების შესამცირებლად ზომების მიღებისკენ მოუწოდებენ.
აღნიშნულის შესახებ ავსტრიის კანცლერმა, კრისტიან შტოკერმა, სლოვაკეთის პრემიერ-მინისტრმა, რობერტ ფიცომ და ჩეხეთის პრემიერ-მინისტრმა, ანდრეი ბაბიშმა ერთობლივ პრესკონფერენციაზე განაცხადეს.
ავსტრიის კანცლერის, კრისტიან შტოკერის თქმით, ელექტროენერგიის ფასების შემცირება „გადაუდებელ ამოცანაა“ და ევროპულ ინდუსტრიას ასე ძალიან არცერთი საკითხი არ აზიანებს.
„ყველაზე გადაუდებელი ამოცანა ენერგიის ფასების, განსაკუთრებით, ელექტროენერგიის ფასების შემცირებაა. ევროპაში ენერგია სტრუქტურულად უფრო ძვირია, ვიდრე რამდენიმე წლის წინ იყო და უფრო ძვირია, ვიდრე იმ ქვეყნებში, რომლებსაც კონკურენციას ვუწევთ. ეს ჩვენს ბიზნესს ახრჩობს და სწორედ ამიტომ სასწრაფოდ გვჭირდება რეფორმა ევროპის ენერგეტიკულ ბაზარზე. როგორც ვიცით, ენერგიის საერთო ფასი გაზის ფასზეა დამოკიდებული და მე აქ ორ მთავარ ვარიანტს ვხედავ, ან უნდა მივაღწიოთ გაზის ფასების მდგრად შემცირებას კრიზისამდელ დონემდე, ან გვჭირდება ფასების სტრუქტურული რეფორმა, რომლის საკვანძო ფრაზაა „დამსახურების მიხედვით““, – განაცხადა კრისტიან შტოკერმა.
სლოვაკეთის პრემიერ-მინისტრმა, რობერტ ფიცომ კი აღნიშნა, რომ ელექტროენერგიის ფასების ცვლილება აუცილებელია იმ კრიზისიდან გამოსასვლელად, რომელშიც ახლა ევროკავშირი იმყოფება.
„ელექტროენერგიის ფასების შეცვლის გადაუდებელი აუცილებლობა პირველი ნაბიჯია იმ უზარმაზარი კრიზისის გადასაჭრელად, რომელსაც ამჟამად ევროკავშირი განიცდის. კრიზისის, რომელმაც შესაძლოა, მთელი ევროკავშირი კატასტროფამდე მიიყვანოს, თუ ევროკომისია და ევროკავშირი ზომებს არ მიიღებენ“, – განაცხადა ფიცომ.
ჩეხეთის პრემიერ-მინისტრის, ანდრეი ბაბიშის განცხადებით, ისინი ეცდებიან, საკითხთან დაკავშირებით თანამშრომლობის მიზნით სხვა ქვეყნებიც მოიზიდონ.