ჰელსინკის კომისიის ყოვლად უარგუმენტო ასეთი სახის შეკრებები უკვე არასერიოზული ხდება, – ამის შესახებ საპარლამენტო უმრავლესობის წევრმა, თენგიზ შარმანაშვილმა ჰელსინკის კომისიაში დღეს დაგეგმილ შეხვედრასთან დაკავშირებით განაცხადა.
შარმანაშვილის თქმით, კიდევ უფრო მძიმე სიტუაცია შეიქმნა, როცა ჰელსინკის კომისიის სხდომაზე „მაკკეინის ინსტიტუტის“ გლობალური დემოკრატიის პროგრამების დირექტორი, საქართველოში NDI-ს ოფისის ყოფილი ხელმძღვანელი ლორა თორნტონი მიიწვიეს.
„კიდევ უფრო მძიმე სიტუაცია შეიქმნა, როცა ლორა თორნტონი მიიწვიეს. ეს ადამიანი საქართველოს მოსახლეობას არეულობისკენ პირდაპირ მოუწოდებდა. უფრო მეტიც, მან განაცხადა, რომ ამდენი დემონსტრაცია ჩატარდა, ამდენი გამოსვლა და მსხვერპლი არ იყოო. მას მიაჩნია, რომ საქართველოში საკრალური მსხვერპლი აუცილებელია. როცა სხდომაზე ასეთ ადამიანს მიიწვევ, რომელსაც შეუძლია, რომ ჰელსინკის კომისიას არაობიექტური ინფორმაცია მიაწოდოს, ამის შემდეგ ყველაფერი ნათელია. მისი ობიექტურობა იქიდანაც ჩანს, რომ ამერიკის მოქმედ პრეზიდენტს ისეთ რაღაცას უწოდებს, მისი გამეორება არ მინდა, რადგან სექსუალურ დანაშაულთან არის დაკავშირებული. ეს ადამიანი იმ კომისიაში მიიწვიეს, სადაც ერთ-ერთი წამყვანი ფიგურა მოქმედი პრეზიდენტის თანაპარტიელი უილსონია. რასთან გვაქვს საქმე? – საქმე გვაქვს იმასთან, რომ ულტრარადიკალური ჯგუფების წამახალისებელი ადამიანები ორივე პარტიაში არიან, როგორც დემოკრატებში, ასევე რესპუბლიკელებში. ამიტომ იქ ობიექტურობას ნუ დაველოდებით, მორიგი ფარსი და შოუ იქნება ტყუილებით გაჯერებული“, – განაცხადა შარმანაშვილმა.