თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი საქართველოში არასამთავრობო ორგანიზაციების დაფინანსების გზების შესახებ ლორა თორნტონის განცხადებას ეხმაურება.
„როგორც მოსალოდნელი იყო, ძალიან არასერიოზული ბრიფინგი გამოუვიდათ, არც ერთი სენატორი და კონგრესმენი არ ესწრებოდა ამ სხდომას და ლორა თორნტონმა ძალიან ფასეული ინფორმაცია მოგვაწოდა ყველას ერთად – ჩამოთვალა ის ორგანიზაციები, რომლებიც აპირებენ საქართველოში თანხების უკანონოდ შემოტანას. მან „სოროსის ფონდი“ და სხვა ორგანიზაციები დაასახელა და გადააჭარბა მარტა კოსს. კოსი ზოგადად მაინც საუბრობდა და ეს კი კონკრეტულად ამბობს, რომელიც ორგანიზაციები აპირებენ ამის გაკეთებას”, – განაცხადა დეპუტატმა.
როგორც ცნობილია, მაკკეინის ინსტიტუტის გლობალური დემოკრატიის პროგრამების უფროსმა დირექტორმა ლორა თორნტონმა ჰელსნკის კომისიის გუშინდელ ბრიფინგზე განაცხადა: „არსებობს გზები, რომლითაც შეგვიძლია გავაგრძელოთ სამოქალაქო საზოგადოებისა და დამოუკიდებელი მედიის მხარდაჭერა საქართველოში. არ მინდა მეთოდებსა და ტაქტიკაზე საჯაროდ საუბარი, მაგრამ ჩვენ კარგად გამოგვდის გზების პოვნა“.