გიორგი გახარია გახლავთ სისხლის სამართლის საქმეში ბრალდებული პირი, რომელსაც აქვს შეფარდებული პატიმრობა და არის ძებნაში. რა თქმა უნდა სამარცხვინოა, როდესაც ის შეიძლება გამოჩნდეს ტერიტორიაზე, სადაც სხვადასხვა ოფიციალური პირი შეიძლება იყოს. შავი იუმორის სფერო არის, რომ ბრალდებული პირი უსაფრთხოების კონფერენციაზე უნდა აღმოჩნდეს, – განაცხადა საქართველოს პარლამენტის თავმჯდომარე შალვა პაპუაშვილმა, მედიის წარმომადგენლის კითხვაზე თუ როგორ შეაფასებს ის ფაქტს, რომ გიორგი გახარია მიუნხენის კონფერენციაში მიიღებს მონაწილეობას.
მისი თქმით, შავი იუმორის საკითხია, რომ მიუნხენის უსაფრთხოების კონფერენციაზე ბრალდებული პირი აღმოჩნდა.
„ეს ადასტურებს, რომ სამწუხაროდ, ევროკავშირის სივრცე გადაიქცა პოლიტიკური კრიმინალების თავშესაფრად. ის არ გახლავთ ერთადერთი, ვინც ამ შემთხვევაში ბრალდებულის სტატუსით არა მხოლოდ თავს აფარებს ბერლინს, არამედ ფულსაც იღებს იქ, როგორც ვიცით და დანიშნული აქვს სტიპენდია. ეს მე მგონი სხვა ფორმა არის, სხვა ქვეყანაში პოლიტიკოსების დაფინანსების. დავით კეზერაშვილი ასევე, ვიცით, რომ თავს აფარებს ევროკავშირის სივრცეს. ზურაბ ადეიშვილს საერთოდ ევროკომისიაში ხელს ართმევენ, წამების სისტემის შემქმნელ ადამიანს. ასე რომ ეს კიდევ ერთხელ აჩვენებს იმ ღირებულებით უფსკრულს, რომლიდანაც მაუწყებლობს დღეს ევროკავშირი“, – განაცხადა შალვა პაპუაშვილმა.