ჩვენ მზად ვართ რუსეთთან მოლაპარაკებებისთვის, თუმცა რუსეთმა უკვე აჩვენა თავისი ამაზრზენი სახე და ეს უნდა იცოდეს ყველამ, ვისაც ჰგონია, რომ მეორე მხარეს არსებობს პატიოსანი პარტნიორი, რომელსაც მართლაც აინტერესებს მშვიდობა, ურთიერთგაგება და ჰუმანურობა ამ სამყაროში. არა, ასეთი პარტნიორი არ არსებობს, – განაცხადა გერმანიის საგარეო საქმეთა მინისტრმა, იოჰან ვადეპულმა მიუნხენის უსაფრთხოების კონფერენციაზე გამოსვლისას.
ვადეპულმა ეს განცხადება მას შემდეგ გააკეთა, რაც ერთდროულად ხუთმა ქვეყანამ განაცხადა, რომ რუსულ კოლონიაში გარდაცვლილი რუსი ოპოზიციონერი ალექსეი ნავალნი პატიმრობაში ეპიბატიდინით მოწამლეს.
„ეპიბატიდინის მოქმედება მორფინზე ორასჯერ ძლიერია. ის პარალიზებას უკეთებს სასუნთქ კუნთებს. მსხვერპლი ტანჯვით იხრჩობა. ვერავინ, გარდა პუტინის გარემოცვის წევრებისა, ვერ მოჰყვება, თუ როგორი იყო დღე, როდესაც ალექსეი ნავალნი გარდაიცვალა რუსულ კოლონიაში. თუმცა ერთი რამ ნათელია: რუსეთის ხელისუფლებას ჰქონდა შესაძლებლობა, მოტივი და საშუალებები ნავალნის მოსაწამლად“, – განაცხადა ვადეპულმა.
მისივე თქმით, ნავალნის სიკვდილი „მძიმე დარტყმად რჩება ყველა იმ ადამიანისთვის, განსაკუთრებით რუსეთში, ვისაც თავისუფალი ქვეყნის იმედი არ დაუკარგავს“. ვადეპულმა ასევე აღნიშნა, რომ კოლონიაში ოპოზიციონერის მოწამვლის მტკიცებულებები ადასტურებს, რომ კრემლი არ ასრულებს ქიმიური იარაღის აკრძალვის შესახებ კონვენციით ნაკისრ ვალდებულებებს.
მისივე თქმით, ნავალნის გარდაცვალებასთან დაკავშირებული ახალი დასკვნების შესახებ ინფორმირებულია ქიმიური იარაღის აკრძალვის ორგანიზაცია.