ბულგარეთის პრემიერ-მინისტრის მოვალეობის შემსრულებლის, ანდრეი გიუროვის განცხადებით, ქვეყნის შინაგან საქმეთა სამინისტრომ ამ დროისთვის საარჩევნო დანაშაულისთვის უკვე 223 პირი დააკავა.
ანდრეი გიუროვი, პრემიერ-მინისტრის მოვალეობის შემსრულებელი: „ამ კვირაში, სოფლის მეურნეობის მინისტრთან და გენერალურ მდივანთან ერთად, იაკორუდაში ვიმყოფებოდი. ყველაზე საშიში და შემაშფოთებელი ის დუმილი იყო, რომელსაც ხალხისგან ვგრძნობდით – მათ საუბრის რცხვენოდათ. ვფიქრობ, ყველაფერი ურთიერთკავშირშია: შეშა, ცხელი სადილი, სოციალური შეღავათები – ეს ყველაფერი მომავალ არჩევნებს და მათ ხმებს უკავშირდება“.
გიუროვი სამართალდამცავებს მიმართავს და მიიჩნევს, რომ პოლიცია ხალხის გვერდით უნდა იყოს, რადგან ეს არა მხოლოდ უსაფრთხოების, არამედ თავისუფლების გარანტიაა. „ხალხმა უნდა დაიჯეროს, რომ თქვენ მათ უფლებებს იცავთ“, – ხაზგასმით აღნიშნა მან.
პრემიერ-მინისტრის მოვალეობის შემსრულებელი, გენერალური მდივნის ინფორმაციაზე დაყრდნობით, ამბობს, რომ რვეულებში ჩამოწერილი მოსყიდულთა სიების თანახმად, თითო ხმა 8 ევროდ იყიდებოდა. ხმების ყიდვა ყალბი ფულითაც ხდებოდა.
ანდრეი გიუროვი, პრემიერ-მინისტრის მოვალეობის შემსრულებელი: „ორი პური და სამი ძეხვი „სალიამი“. ეს დამამცირებელია. ხმებს ყალბი ფულითაც ყიდულობენ. ყველაზე მნიშვნელოვანი კითხვა, რომელსაც აქ ვსვამთ, არა ამ 223 ხმის მყიდველს, არამედ მათ უკან მდგომთ ეხება. ვინ არიან ისინი, ვისაც პარლამენტში მოხვედრა მევახშეებისა და სიების საშუალებით სურთ? ჩვენ ვერ ვხედავთ პოლიტიკურ პარტიებს, რომლებიც მათ უპირისპირდებიან. ისინი თავს ესხმიან დროებით მთავრობას – სწორედ ამაზეა აგებული მათი წინასაარჩევნო კამპანია. თუმცა, ჩვენ არ ვაპირებთ პარტიულ კინკლაობაში ჩავებათ. ჩვენი ამოცანაა, ხმების მომსყიდველებს ვებრძოლოთ“.
„ჩვენი მისია კვლავ იმაში მდგომარეობს, რომ ხალხს ვაჩვენოთ – სახელმწიფო მათზე მაღლა კი არ დგას, არამედ მათ გვერდითაა“, – დასძინა პრემიერ-მინისტრის მოვალეობის შემსრულებელმა.
https://bntnews.bg/news/andrei-gyurov-223-ma-sa-zadarzhanite-za-izborni-prestapleniya-ot-mvr-1387476news.html