9 აპრილს, ესტონეთის მთავრობამ მიიღო გადაწყვეტილება, შეაჩეროს ახალი საბრძოლო მანქანების შესყიდვის 500-მილიონიანი პროგრამა და გამოთავისუფლებული თანხები საჰაერო თავდაცვის, დრონებისა და უპილოტო სისტემებისკენ მიმართოს. ამ გადაწყვეტილების მიზეზებს ქვეყნის თავდაცვის მინისტრი, ჰანო პევკური განმარტავს.
„პროგრამის შეჩერება უკრაინის გამოცდილების ანალიზმა, ბაზრის პირობებმა და თავდაცვის ძალების მეთაურის სამხედრო რჩევამ განაპირობა“, – აცხადებს პევკური.
რომ არა ეს გადაწყვეტილება, ახალი საბრძოლო მანქანები ესტონეთში 2029 და 2030 წლებში უნდა ჩამოსულიყო.
„სხვა აუცილებელი ნაბიჯების გადასადგმელად და არსებული საბრძოლო მანქანების ექსპლუატაციის ვადის გასახანგრძლივებლად, ეს გადაწყვეტილება ახლა უნდა მიგვეღო,“ – აღნიშნა პევკურმა.
ესტონეთი გეგმავს, არსებული CV90 ტიპის საბრძოლო მანქანების ექსპლუატაციის ვადა 10 წლით გაახანგრძლივოს. თავდაცვის მინისტრის თქმით, იმის მიუხედავად, რომ ესეც მნიშვნელოვანი თანხა დაჯდება, ის მაინც ბევრჯერ იაფია, ვიდრე ახალი მანქანების შეძენა.
პევკური ამბობს, რომ საბრძოლო მანქანების ფასები თანდათან იზრდება, რაც უკვე აისახება შეთავაზებებში.
„ბრძოლის ველზე მძიმე ტექნიკის როლი მცირდება. აქედან გამომდინარეობს თავდაცვის ძალების მეთაურის რჩევა, რომ 10-წლიან პერსპექტივაში მათი ჩანაცვლება გონივრული არ არის და უმჯობესია არსებული მანქანების მოდერნიზება“, – განმარტა მან.
გადამისამართებული თანხები გაზრდის ქვეყნის თავდაცვის ძალების საცეცხლე ძალასა და მობილობას, მოხმარდება უპილოტო სისტემების სრულყოფას და ოპერატიული ვითარების შესახებ ინფორმირებულობას გააუმჯობესებს.
„ჩვენ ფეხს ვუწყობთ იმას, რასაც უკრაინისგან ვსწავლობთ და მომდევნო წლებში აუცილებლად გავაძლიერებთ საჰაერო თავდაცვის შესაძლებლობებს. თავდაცვის ძალების მეთაურის სამხედრო რჩევები აისახება თავდაცვის ინვესტიციების მომდევნო ოთხწლიან გეგმაში, რომელშიც აქცენტი გაკეთდება საბრძოლო დრონებზე, საჰაერო თავდაცვასა და უპილოტო სისტემებზე“, – აცხადებს პევკური.
სამშაბათს, ესტონეთის საზოგადოებრივი რადიოს ეთერში საუბრისას, პევკურმა აღნიშნა, რომ რადგან ტექნოლოგიები ძალიან სწრაფად ვითარდება, მომავალი ინვესტიციების სქემა მოქნილი უნდა იყოს, რათა, საჭიროების შემთხვევაში, შესყიდვების გეგმების კორექტირება მოხერხდეს.
„ტექნოლოგიური განვითარება, სავარაუდოდ, მიგვიყვანს იმ წერტილამდე, სადაც ჩვენი შესაძლებლობები მაქსიმალურად იქნება გაუმჯობესებული. მაგრამ ვერ მოგცემთ იმის გარანტიას, რომ ყველა პრობლემის გადაჭერას შევძლებთ, რადგან თავდამსხმელი მხარეც ცვლის თავის ვექტორებს და ახალ გადაწყვეტილებებს იღებს. ჩვენ უკვე გვაქვს რაკეტისძრავიანი დრონები, ახლა კი ელექტროძრავიანი დრონები იტესტება, რაც იმას ნიშნავს, რომ მხოლოდ აკუსტიკური სენსორების იმედად ყოფნა აღარ მოგვიწევს. მიუხედავად ამისა, ამჟამად ჩვენ საკუთარ აკუსტიკურ სენსორულ ქსელს მაინც ვქმნით“, – ამბობს თავდაცვის მინისტრი.
„ასე რომ, მოვლენების განვითარებას ფეხი უნდა ავუწყოთ და ის ასობით მილიონი ევროც, რომელსაც მომდევნო თვეებსა და წლებში დრონების საწინააღმდეგო შესაძლებლობებში ვდებთ, გონივრულად უნდა გადავანაწილოთ“, – დასძინა პევკურმა.
https://news.err.ee/1609991037/estonia-halts-500-million-combat-vehicle-procurement-to-fund-air-defense