ბორტგამცილებლების გაფიცვამ გერმანული ავიაკომპანია „ლუფტჰანზისა“ და მისი ქვედანაყოფის, „სიტი ლაინის“ მუშაობის შეფერხება გამოიწვია. გაფიცვა პარასკევს, 10 აპრილს, ღამის 00:01 საათზე დაიწყო და საღამოს 20:00 საათამდე გაგრძელდება. შედეგად, ფრანკფურტისა და მიუნხენის მთავარმა საერთაშორისო აეროპორტებმა, ისევე როგორც გერმანიის არაერთმა მცირე აეროპორტმა, ფრენები გააუქმეს. ასევე გაუქმდა 16 რეისი ერთი მხრივ, პრაღასა და, მეორე მხრივ, ფრანკფურტსა და მიუნხენს შორის.
გაფიცვის ორგანიზატორია ბორტგამცილებელთა პროფკავშირი სახელწოდებით UFO (Unabhängige Flugbegleiter Organisation – „ბორტგამცილებელთა დამოუკიდებელი ორგანიზაცია“) და მასში დაახლოებით 20 ათასამდე თანამშრომელი მონაწილეობს. მიუნხენისა და ფრანკფურტის გარდა, პროტესტმა ასევე მოიცვა ბერლინის, ჰამბურგის, კიოლნის, დიუსელდორფის, ჰანოვერისა და სხვა ქალაქების აეროპორტები. გაუქმდა ასობით რეისი. გერმანიის უდიდესი აეროპორტიდან, ფრანკფურტიდან პარასკევისთვის დაგეგმილი „ლუფტჰანზას“ რეისების 75% არ შესრულდება; მსგავსი ვითარებაა ჩამოფრენებთან დაკავშირებითაც.
პრაღის ვაცლავ ჰაველის აეროპორტის ვებ-გვერდის ინფორმაციით, პარასკევს ფრანკფურტიდან და მიუნხენიდან ოთხ-ოთხი თვითმფრინავი არ ჩამოფრინდება. ასევე არ შესრულდება ოთხ-ოთხი რეისი საპირისპირო მიმართულებით. ჯამში, გაფიცვის გამო გაუქმდა თექვსმეტი ფრენა პრაღასა და გერმანიის ორ უდიდეს აეროპორტს შორის.
პროფკავშირის განცხადებით, გაფიცვის მიზეზი გახდა დამსაქმებლის უარი, მოლაპარაკებები გაემართა ბორტგამცილებლების სამუშაო პირობების გაუმჯობესებასა და „ლუფტჰანზა-სიტი ლაინის“ ქვედანაყოფის თანამშრომლების სოციალური გეგმის განხილვაზე. ეს უკანასკნელი მომავალ წელს ფუნქციონირებას შეწყვეტს და მას ახალი კომპანია, სახელწოდებით „ლუფტჰანზა-სიტი ლაინსი“ ჩაანაცვლებს.
თებერვალში „ლუფტჰნზას“ ბორტგამცილებლები, კომპანიის პილოტებთან ერთად, ერთი დღით გაიფიცნენ, მარტში კი ორდღიანი გაფიცვა ცალკე გამართეს. ორივე პროტესტი პრაღასთან საჰაერო მიმოსვლაზეც აისახა.
https://ct24.ceskatelevize.cz/clanek/svet/stavka-personalu-ochromila-provoz-lufthansy-zruseny-byly-i-spoje-s-prahou-372231