რუმინეთის სოციალ-დემოკრატიულმა პარტიამ (PSD) გამოაცხადა, რომ პრემიერ-მინისტრ ილიე ბოლოჟანის კოალიციური მთავრობა დატოვა, რამაც არასტაბილურობით ისედაც დაღლილ ქვეყანაში ახალი პოლიტიკური კრიზისი გამოიწვია. სოციალ-დემოკრატიული პარტია, რომელიც პარლამენტში ყველაზე დიდი ძალაა (465 მანდატიდან დაახლოებით 130 მას ეკუთვნის), პროევროპულ სამთავრობო კოალიციას გასული წლის ივნისში შეუერთდა. ამით დასრულდა მრავალთვიანი პოლიტიკური რყევები, რომელიც 2024 წლის დეკემბერში რუსეთის ჩარევის ბრალდების გამო საპრეზიდენტო არჩევნების გაუქმების შემდეგ დაიწყო. „ამიერიდან პრემიერ-მინისტრს აღარ აქვს საპარლამენტო უმრავლესობის მხარდაჭერა, რაც იმას ნიშნავს, რომ მას აღარ გააჩნია დემოკრატიული ლეგიტიმაცია, რათა რუმინეთის მთავრობის მეთაურის პოსტი ეკავეს,“ – განაცხადა კოალიციიდან გასულმა პარტიამ.
ევროკავშირის წევრ ქვეყნებს შორის არსებული ყველაზე დიდი დეფიციტის შესამცირებლად, ბოლოჟანის მთავრობამ არაერთი არაპოპულარული ზომა გაატარა, რომელთა შორის აღსანიშნავია გადასახადების გაზრდა. ამ ნაბიჯებმა PSD-ის უკმაყოფილება გამოიწვია, რადგან პარტია ხედავს, რომ მისი ელექტორალური ბაზა ულტრამემარჯვენეების სასარგებლოდ მცირდება.
პროევროპული კურსი
კოალიციიდან გასვლისთანავე, PSD-მ განაცხადა, რომ მზადაა „ახალი პროევროპული მთავრობის“ ნაწილი გახდეს და სხვა პრემიერ-მინისტრს დაუჭიროს მხარი, „პოლიტიკოსი იქნება ის თუ ტექნოკრატი“. პრემიერ-მინისტრმა ილიე ბოლოჟანმა ბოლო პერიოდში რამდენჯერმე განაცხადა, რომ გადადგომას არ აპირებს და მთავრობის ხელმძღვანელობას გააგრძელებს. თუმცა, კოალიციის დაშლის შემდეგ, მან PSD-ის მინისტრებს „ბოლო 10 თვის განმავლობაში თანამშრომლობისთვის“ მადლობა გადაუხადა და მათი შემცვლელი მოვალეობის შემსრულებლები დაასახელა. თავად ბოლოჟანი, პრემიერობის პარალელურად, ენერგეტიკის მინისტრის მოვალეობასაც შეასრულებს.
57 წლის პოლიტიკოსმა რეფორმატორის რეპუტაცია დაიმკვიდრა, რომელიც სახელმწიფო სახსრების ფლანგვის აღკვეთასა და ევროკავშირის ფონდების მოზიდვაზეა ორიენტირებული, თუმცა ხშირად მას „მოუქნელობის“ გამო აკრიტიკებენ. ქვეყნის პრეზიდენტმა, ნიკუშორ დანმა, რომელმაც მმართველ კოალიციაში შემავალ პარტიებთან კონსულტაციები გამართა, შეხვედრების შემდეგ ყველას სიმშვიდისკენ მოუწოდა და ხაზგასმით აღნიშნა, რომ რუმინეთი პროევროპულ კურსს არ გადაუხვევს. მისივე თქმით, კოალიციაში არსებული განხეთქილების მიუხედავად, ქვეყანა ფინანსურ სტაბილურობასა და ევროპულ ფონდებზე წვდომას შეინარჩუნებს; მან ასევე გამორიცხა ხელისუფლებაში ულტრამემარჯვენეების მოსვლის ყოველგვარი შესაძლებლობა. თუმცა, როგორც პოლიტოლოგმა სერჯიუ მისკოუმ საინფორმაციო სააგენტო „ფრანს პრესს“ განუცხადა, რომ საპარლამენტო უმრავლესობის გარეშე რუმინეთი პოლიტიკური კრიზისის წინაშე აღმოჩნდა, რის გამოც „ბევრი აუცილებელი გადაწყვეტილების მიღება ვეღარ მოხერხდება“.
მან პოლიტიკურ ძალებს „უპასუხისმგებლოები“ უწოდა. „ის ძლიერი მხარეები, რაც რუმინეთს ჰქონდა, კერძოდ კი სტაბილურობა და პროევროპულმა ძალების გადაჯგუფების უნარი, რისი წყალობითაც მოხერხდა რუსეთის მიერ მხარდაჭერილი პოპულიზმისა და ნაციონალიზმის დამარცხება, თანდათან იკარგება და ამ უპასუხისმგებლობას ეწირება მსხვერპლად“, – დასძინა მისკოუმ.
https://www.afp.com/en/agency/our-commitments/afp-charters