24 აპრილს, ლიეტუვის გენერალურმა პროკურატურამ პარლამენტარსა და ყოფილ პრემიერ-მინისტრ საულიუს სკვერნელისს ქრთამის აღების საქმეზე წაუყენა ბრალი. კორიფციულ სქემაში სოფლის მეურნეობის სამინისტროს ერთ-ერთი სტრუქტურული ერთეული – მცენარეთა დაცვის სახელმწიფო სამსახური ფიგურირებს.
გენერალური პროკურატურისა და სპეციალური საგამოძიებო სამსახურის ინფორმაციით, ლიეტუველი პოლიტიკოსი ქრთამის აღებაშია ეჭვმიტანილი. პროკურორების განცხადებით, არსებობს საკმარისი მტკიცებულებები იმის სავარაუდოდ, რომ სკვერნელისმა, სეიმის თავმჯდომარის პოსტზე ყოფნისას, პოლიტიკური მფარველობის სანაცვლოდ, ნაღდი ფულის სახით, სულ მცირე, 51 000 ევრო აიღო. „არსებობს ეჭვი, რომ სკვერნელისმა შესაძლოა იცოდა, რომ უკანონო ფულადი ჯილდო მას იმ უკანონო შემოსავლებიდან ეძლეოდა, რომელიც მისმა თანამზრახველებმა კორუფციული სქემის ფარგლებში მიიღეს“, – ნათქვამია პროკურატურის განცხადებაში. გავრცელებული ინფორმაციით, ქრთამი პოლიტიკოსს მისმა მრჩეველმა, აგნე სილიცკიენემ გადასცა, რომელიც მცენარეთა დაცვის სახელმწიფო სამსახურში მუშაობდა. სეიმმა უკვე გასცა სკვერნელიუსის სისხლისსამართლებრივი დევნის ნებართვა და დეპუტატს იმუნიტეტი გამარტივებული იურიდიული პროცედურით მოუხსნა. გენერალური პროკურატურის ცნობით, ამ საქმეში ქრთამის საერთო ოდენობამ, შესაძლოა, სულ მცირე 1.112 მილიონ ევროს მიაღწიოს. ოფიციალური პირების თქმით, 2025 წლის ივნისიდან მოყოლებული, მცენარეთა დაცვის სამსახურის ყოფილი ხელმძღვანელი იურიუს კორნიენკო, მისი მრჩეველი აურელიუს საპრაუსკასი და სხვები ყოველთვიურად ანაწილებდნენ იმ ქრთამებს, რომელსაც მცენარეებისა და მცენარეული პროდუქტების გადამზიდი კომპანიების წარმომადგენლებისგან, ფიტოსანიტარიული სერთიფიკატების გაცემის სანაცვლოდ იღებდნენ. ფული, სავარაუდოდ, ნაწილდებოდა დანაშაულებრივი ჯგუფის წევრებსა და სხვა პირებს შორის, რომელთა შორის იყო სკვერნელისიც. ხელისუფლების წარმომადგენლებმა განაცხადეს, რომ ეს გარემოებები დაფიქსირებულია საბუღალტრო დოკუმენტებში, რომელშიც სკვერნელისი Krabas-ის (კიბორჩხალა) მეტსახელით არის მოხსენიებული.
გენერალურმა პროკურორმა, ნიდა გრუნსკიენემ აღნიშნა, რომ პოლიტიკოსის წინააღმდეგ წაყენებული ბრალდებები მოწმეებისა და ეჭვმიტანილების ჩვენებებს, ჩხრეკისას მოპოვებულ მტკიცებულებებსა და წინასწარი გამოძიების სხვა დოკუმენტებს ეფუძნება. სკვერნელისი ბრალდებებს უარყოფს. მან ჟურნალისტებს განუცხადა, რომ არც დანაშაულებრივი სქემის შესახებ იცოდა და არც ფული მიუღია. წინასწარი გამოძიების ფარგლებში, ბრალი, მთლიანობაში, 16 პირს წაუყენეს, მათ შორის – სოფლის მეურნეობის ყოფილ მინისტრ კაზის სტარკევიჩიუსს.
https://www.lrt.lt/en/news-in-english/19/2908248/lithuanian-prosecutors-charge-ex-pm-skvernelis-in-bribery-case