საქართველოს პრემიერ-მინისტრმა ირაკლი კობახიძემ, კულტურის მინისტრ თინათინ რუხაძესთან ერთად, ქართული ხალხური სიმღერისა და ცეკვის სახელმწიფო აკადემიურ ანსამბლ „ერისიონის“ ახალი შენობა დაათვალიერა.
მთავრობის მეთაური ახლად გახსნილი შენობის ინფრასტრუქტურას გაეცნო, რომელიც სრულად შეესაბამება თანამედროვე სტანდარტებს და სარეპეტიციო სივრცეებთან ერთად 100 მაყურებელზე გათვლილ საკონცერტო დარბაზს, საგრიმიოროებს, ხმის ჩამწერ სტუდიას და საოფისე სივრცეებს აერთიანებს.
პრემიერ-მინისტრმა ანსამბლის დირექტორ ვანო ჩხაიძეს, სამხატვრო ხელმძღვანელ შერმანდი ჭკუასელს და ანსამბლის წევრებს ახალი შენობის გადაცემა მიულოცა და წარმატებები უსურვა.
„წლების მანძილზე ანსამბლს არ ჰქონდა გამართული შენობა და ახლა უკვე სრულიად ახალ სივრცეში შეუძლიათ, განაგრძონ შემოქმედებითი საქმიანობა. იცით, რამხელაა ამ ანსამბლის წვლილი ჩვენი კულტურის განვითარებაში, ჩვენი თვითმყოფადობის შენარჩუნებაში და ახალი შენობა მისცემთ საშუალებას, ძალიან დიდ წარმატებებს მიაღწიონ მომავალში და გააგრძელონ ის საქმე, რომელიც ათწლეულების წინ დაიწყო. ეს არის ძალიან მნიშვნელოვანი მთლიანად ჩვენი ქვეყნისთვის, ჩვენი კულტურის განვითარებისთვის“, – განაცხადა ირაკლი კობახიძემ.
პრემიერ-მინისტრმა მადლობა გადაუხადა თეა წულუკიანს, რომლის მინისტრობის დროსაც ეს საქმე დაიწყო და კულტურის მინისტრ თიკა რუხაძეს – წამოწყებული საქმის ბოლომდე მიყვანისთვის.
ახალი შენობა სრულად ადაპტირებულია შეზღუდული შესაძლებლობების მქონე პირებისთვის და ის ანსამბლ „ერისიონს“ უვადო სარგებლობით გადაეცა.
