დღეს ჩვენ პრაქტიკულად, საბოლოო, დამამთავრებელი ეტაპის სამუშაოებზე ვართ. ვემზადებით მუზეოგრაფიის მოსაწყობად, ბიბლიოთეკის აღსაჭურვად, ოდის მოსაწყობად, საბოლოო კოსმეტიკური სამუშაოებია დარჩენილი. აქაურობა უნდა იყოს მოვლილი, დაფასებული და ცოცხალი, – განაცხადა საქართველოს კულტურის მინისტრმა თინათინ რუხაძემ ლევილის მამულის რეაბილიტაციის შესახებ „იმედის კვირასთან“.
მან ლევილის მამულის სამომავლო გეგმებზეც ისაუბრა.
„იუნესკოს გენერალურ დირექტორთან ვისაუბრეთ, რომ ლევილში შეიძლება, სხვადასხვა არტრეზიდენცია გაიმართოს და ყველა ეს სივრცე მოხმარდება ზუსტად იმას, რომ საქართველოს კულტურა და ქართული ისტორია, ჩვენი ქვეყანა წარმოაჩინოს აქ – შუაგულ ევროპაში“, – განაცხადა კულტურის მინისტრმა.
მუზეუმთან დაკავშირებით კი, რომელიც ლევილის სასახლეში უნდა განთავსდეს, თინათინ რუხაძემ აღნიშნა, რომ მუზეუმის ძირითადი შინაარსის განმსაზღვრელი ეროვნული მუზეუმია.
„ძალიან დიდი იმედი მაქვს, რომ ეროვნული მუზეუმი ამ პროექტის მუზეოგრაფიასაც ისე გააკეთებს, როგორც სხვა მუზეუმებს საქართველოში, რომლებსაც მთელი მსოფლიოს აღიარება აქვს“, – აღნიშნა მინისტრმა.