ყველა უნდა იყოს თანმიმდევრული ჩვენი ეროვნული ინტერესების დაცვაში. არ უნდა გაკეთდეს მხოლოდ განცხადებები კონკრეტულ თემებთან დაკავშირებით. ქმედებით უნდა გვაჩვენონ, რომ ევროპული ბიუროკრატია დგას ქართველი ხალხის მხარეს, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს კითხვაზე საპასუხოდ განუცხადა.
კერძოდ, მედიის წარმომადგენელმა კობახიძეს კითხვა დაუსვა ევროკავშირის საგარეო პოლიტიკური უწყების ხელმძღვანელის, კაია კალასის განცხადებაზე, სადაც კალასმა აღნიშნა: „ევროკავშირს უკრაინაზე მოლაპარაკებების ფარგლებში შეუძლია, მოსთხოვოს რუსეთს არმიის შემცირება, მოლდოვიდან და საქართველოდან ჯარების გაყვანა, ეს ევროპული უსაფრთხოების ინტერესშია“. ჟურნალისტმა კობახიძეს ჰკითხა, რაზე მიანიშნებს ეს ფაქტი?
„თავისთავად, ასეთი საუბარი კარგია, მაგრამ ცნობილი გამონათქვამია, ფიცი მწამს, ბოლო მაკვირვებს. ჩვენი ეროვნული ინტერესების დაცვაზე როდესაც არის საუბარი, მაშინ სხვა ნაბიჯებიც უნდა მოაყოლონ ამას და არ უნდა აკეთებდნენ ისეთ რაღაცას, რაც ქვეყანას ხელოვნურად უქმნის დამატებით რისკებს სხვადასხვა მიმართულებით. ამიტომ ყველა უნდა იყოს თანმიმდევრული ჩვენი ეროვნული ინტერესების დაცვაში. არ უნდა გაკეთდეს მხოლოდ განცხადებები კონკრეტულ თემებთან დაკავშირებით. ქმედებით უნდა გვაჩვენონ, რომ ევროპული ბიუროკრატია დგას ქართველი ხალხის მხარეს. აქამდე, მთელი ამ წლების განმავლობაში ევროპული ბიუროკრატია იდგა სწორედ საპირისპირო მხარეს და უპირისპირდებოდა ქართველი ხალხის, საქართველოს ეროვნულ ინტერესებს“, – განაცხადა პრემიერ-მინისტრმა.