ორმა ამერიკელმა კონგრესმენმა ხუთშაბათს განაცხადა, რომ აშშ-ის მთავრობამ დადებითად უნდა უპასუხოს პრეზიდენტ ვოლოდიმირ ზელენსკის თხოვნას დამატებითი საჰაერო თავდაცვის რაკეტების მიწოდების შესახებ, რათა უკრაინის დედაქალაქი რუსეთის მხრიდან მოსალოდნელი ესკალაციისა და დაბომბვებისგან დაიცვას.
მიმდინარე კვირაში ზელენსკიმ წერილით მიმართა აშშ-ის პრეზიდენტს, დონალდ ტრამპსა და აშშ-ის კონგრესის წევრებს, რომელშიც Patriot-ის დამატებითი სისტემები და რაკეტსაწინააღმდეგო თავდაცვის საშუალებები მოითხოვა.
ორშაბათს რუსეთმა გააფრთხილა უცხოელები და დიპლომატები, დაეტოვებინათ კიევი და განაცხადა, რომ უკრაინის დედაქალაქში მდებარე სამიზნეებზე „სისტემატურ დარტყმებს“ განახორციელებდა. უკრაინის სამხედრო-საჰაერო ძალების ცნობით, კვირას განხორციელებული ბოლო მასირებული იერიშის დროს რუსეთმა უკრაინის წინააღმდეგ 30 ბალისტიკური რაკეტა გამოიყენა, რომელთაგან მხოლოდ 11-ის ჩამოგდება მოხერხდა.
კიევში ზელენსკისთან შეხვედრის შემდეგ, კონექტიკუტის შტატის სენატორმა რიჩარდ ბლუმენტალმა განაცხადა, რომ წარსულში შეერთებულმა შტატებმა არაერთხელ დააკმაყოფილა კიევის მოთხოვნები დამატებითი შეიარაღების შესახებ.
„ჩემი იმედი და მოლოდინი ისეთია, რომ ამერიკა დადებითად უპასუხებს ამ თხოვნას“, – განაცხადა ბლუმენტალმა, რომელიც თანაპარტიელ „დემოკრატთან“, აშშ-ის წარმომადგენელთა პალატის წევრ ჯიმ ჰაიმსთან ერთად გამოდიოდა.
ბლუმენტალის თქმით, ვაშინგტონში დაბრუნებისთანავე ორივე კონგრესმენი ლობირებას გაუწევს უკრაინისთვის დამატებითი საჰაერო თავდაცვის რაკეტების გადაცემასა და რუსეთის წინააღმდეგ სანქციების გამკაცრებას: „ჩვენს მისიადაა მიჩნეული, რომ დაბრუნებისას დავრწმუნდეთ იმაში, რომ უკრაინას აქვს შესაბამისი საშუალებები ამ საქმის გასაკეთებლად“.
მას შემდეგ, რაც ტრამპმა თანამდებობა დაიკავა, უკრაინა Patriot-ის რაკეტებს ნატოს „უკრაინის პრიორიტეტული მოთხოვნების სიის“ (PURL) ინიციატივის ფარგლებში ყიდულობს, რომელსაც მისი ევროპელი მოკავშირეები აფინანსებენ.
თავის წერილში ზელენსკიმ მადლობა გადაუხადა შეერთებულ შტატებს მხარდაჭერისთვის, თუმცა აღნიშნა, რომ PURL-ის ფარგლებში რაკეტსაწინააღმდეგო თავდაცვის საშუალებების მიწოდების ტემპი აღარ შეესაბამება იმ საფრთხის მასშტაბებს, რომლის წინაშეც უკრაინა დგას.