სამხრეთ გერმანიაში, მიუნხენის აეროპორტში, ფრენები დაახლოებით ერთი საათით შეჩერდა მას შემდეგ, რაც ორმა პილოტმა დრონის დაფიქსირების შესახებ განაცხადა, – ინფორმაციას Reuters-ი აეროპორტისა და პოლიციის წარმომადგენლებზე დაყრდნობით ავრცელებს.
აეროპორტის წარმომადგენლის განცხადებით, მუშაობის შეჩერების პერიოდში, 20-ზე მეტი რეისი სხვა აეროპორტებში გადამისამართდა.
სააგენტო აეროპორტის წარმომადგენელზე დაყრდნობით წერს, რომ ადგილობრივი დროით დაახლოებით დილის 9:00 საათზე, ასაფრენ ბილიკზე მყოფმა ორმა პილოტმა, აეროპორტის თავზე დრონი შენიშნა, რის გამოც ფრენები დროებით შეჩერდა.
“ფართომასშტაბიანმა საპოლიციო ოპერაციებმა, მათ შორის, ტერიტორიის პოლიციის ვერტმფრენის გამოყენებით დათვალიერებამ, არანაირი შედეგი არ გამოიღო. მას შემდეგ, რაც საჰაერო მიმოსვლისთვის საფრთხე აღმოიფხვრა, აეროპორტის მუშაობა დილის 10:05 საათზე განახლდა”, – განაცხადა პოლიციის წარმომადგენელმა.
სამართალდამცველების ცნობით, ინციდენტის გარემოებების დასადგენად გამოძიება დაიწყო.