ონისე ოქრიაშვილთან დაკავშირებულ ინციდენტს საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი ეხმაურება.
მისი თქმით, ძალადობა მიუღებელია თუმცა ასევე დაუშვებელია საზოგადოებისთვის სენსიტიურ თემებზე შეურაცხმყოფელი ხუმრობა.
„ცხადია, რომ ძალადობას გამართლება არ გააჩნია და ცივილიზებულ სამყაროში მუშტი-კრივი არ უნდა იყოს ურთიერთობის გაჩენის საგანი. ამ სიტუაციას აქვს მეორე და ძალიან მნიშვნელოვანი მომენტი. კარგად უნდა გაიაზროს ყველამ, რომ არსებობს ღირებულებები ჩვენს საზოგადოებაში, რომლის მიმართ საზოგადოება არის ძალიან სენსიტიური, ძალიან ემოციური. მორალური ზღუდის გადალახვის გზით სურდათ და სურთ გარეშე ძალებს მოსდონ თავისი დეგრადირებული დღის წესრიგი მთლიანად ქართულ რეალობას და მოცემულობას“, – განაცხადა დავით მათიკაშვილმა.
ცნობისთვის, ოპოზიციის აქტივისტ ონისე ოქრიაშვილს, რომელიც ერთ-ერთ პოდკასტში მწერალ ნოდარ დუმბაძის მისამართით სიძულვილის ენას იყენებს, ფიზიკურად გაუსწორდნენ.
ონისე ოქრიაშვილზე ძალადობის ბრალდებით, ერთი ადამიანია დაკავებული. ნიკო ხურცილავა საგამოძიებო უწყებაში თავად გამოცხადდა. მას ბრალს, სავარაუდოდ, დღეს წარუდგენენ.