სამხედრო გაწვევისა და რეკრუტირების ეროვნული სააგენტოს შიდა ქართლისა და სამცხე-ჯავახეთის რეგიონული ცენტრის ხელმძღვანელობამ ხაშურის მუნიციპალიტეტში წვევამდელთა ეროვნულ სამხედრო სამსახურში ნებაყოფლობით დარეგისტრირებული პირების მშობლებს მადლობის წერილები გადასცეს.
თავდაცვის სამინისტროს ინფორმაციით, მადლობის სიგელით დაჯილდოვდა ასევე, ხაშურის №7 საჯარო სკოლა, რომელიც მუნიციპალიტეტში ნებაყოფლობით გაწვეულთა რაოდენობით მოწინავე აღმოჩნდა.
ხაშურის მუნიციპალიტეტის მერიაში გამართული ღონისძიების ფარგლებში, შიდა ქართლისა და სამცხე-ჯავახეთის რეგიონული ცენტრის უფროსმა, ვიცე-პოლკოვნიკმა გოგი ნოზაძემ და მასტერ-სერჟანტმა გიორგი ტარიელაშვილმა შეხვედრის მონაწილეებს წვევამდელთა ეროვნულ სამხედრო სამსახურში მსახურის ფორმები და პირობები გააცნეს. ასევე, ისაუბრეს პროფესიულ საკონტრაქტო სამსახურსა და აქტიური რეზერვის განახლებული სისტემის შესახებ.
განახლებული სისტემის თანახმად, წვევამდელთა ეროვნული სამხედრო სამსახური სამ კატეგორიად იყოფა: 6-თვიანი სამსახური საბრძოლო ქვედანაყოფებში, 8-თვიანი სამსახური საბრძოლო მხარდაჭერისა და საბრძოლო უზრუნველყოფის ქვედანაყოფში ან 11-თვიანი სამსახური უმცროს სამეთაურო თანამდებობაზე, წინასწარ განსაზღვრული სპეციალობით. 11-თვიანი სამხედრო სამსახურის დასრულების შემდეგ წვევამდელებს ოფიცრის (ლეიტენანტი) ან უმცროსი სერჟანტის წოდება მიენიჭებათ. წვევამდელთა ეროვნულ სამხედრო სამსახურში საკუთარი სურვილით დარეგისტრირებულ პირებს ანაზღაურება 30%-ით მეტი ოდენობით დაენიშნებათ.
შეხვედრას წვევამდელების მშობლებთან და ოჯახის წევრებთან ერთად, ხაშურის მუნიციპალიტეტის მერი, საკრებულოს თავმჯდომარე და ადმინისტრაციული ერთეულების წარმომადგენლები დაესწრნენ.