საპროცესო შეთანხმება მხოლოდ ბრალის აღიარებით იქნება შესაძლებელი, ბურჭულაძე უკანონო პატიმრობას ახსენებს, ვიდრე ისინი უკანონო პატიმრობას აიფარებენ ფარად, მანამდე საპროცესო შეთანხმება წარმოუდგენელი იქნება, – ამის შესახებ პარლამენტის ვიცე-სპიკერმა, ნინო წილოსანმა განაცხადა.
წილოსანს კითხვა დაუსვეს 4 ოქტომბრის საქმეზე მსჯავრდებულ პაატა ბურჭულაძის მიმართვაზე, სადაც ის აღნიშნავს: „4 ოქტომბრის საქმეზე დაკავებულების მიმართ ჩემი მოწოდებაა, მიიღოთ პროკურატურის მიერ შემოთავაზებული საპროცესო შეთანხმება და განთავისუფლდეთ უკანონო პატიმრობიდან“.
„როგორც ჩანს, პაატა ბურჭულაძე საჯარო წერილით ამბობს, რომ იმედი გადაეწურათ როგორც ქვეყნის შიგნით, ასევე მის გარეთ არაკანონიერი, არალეგიტიმური ზეწოლის, რომლის საფუძველზეც მოლოდინი ჰქონდათ, რომ საპატიმროდან ყველანაირი წესების, ნორმების გარეშე გათავისუფლდებოდნენ. ახლა საპროცესო შეთანხმებას მიმართავენ. პაატა ბურჭულაძის მოწოდება იმას გულისხმობს, რომ მის გვერდით მდგომი ადამიანების მხრიდან საპროცესო შეთანხმების მიღება მოხდეს. საპროცესო შეთანხმება მხოლოდ ბრალის აღიარებით და მონანიებით იქნება შესაძლებელი. შესაბამისად, თოთოეულ მათგანს მოუწევს მონანიება და აღიარება ბრალის, რომელიც საქართველოს წინაშე ჩაიდინეს. მის წერილში იკვეთება სურვილი, რომ მისი თანამებრძოლები, დანაშაულის მონაწილეები გათავისუფლდნენ. ალბათ ამის შემდეგ სურვილი ექნება, რომ თავადაც იყოს საპროცესო შეთანხმების შედეგად გათავისუფლებული. ალბათ, ეს წინაპირობაა, რომ პაატა ბურჭულაძეც დათანხმდება საპროცესო შეთანხმებას. მას წერილში უცნაურად უწერია, უკანონო პატიმრობას ახსენებს. ვიდრე ისინი უკანონო პატიმრობას აიფარებენ ფარად, მანამდე საპროცესო შეთანხმება წარმოუდგენელი იქნება. ეჭვი მეპარება, რომ გულწრფელი სინანული იყოს, მათ რაციონალური მოტივები ამოძრავებთ, საპატიმროში ყოფნა მოსწყინდათ. საქართველოს წინაშე მავნებლური დანაშაული ჩაიდინეს. ახლა ხედავენ, რომ შეიძლება, გამოსავალი საპროცესო შეთანხმებაში იყოს“, – განაცხადა ნინო წილოსანმა.