აშშ-ს სურს, გაარკვიოს, რამდენად ერთგულია ნატოს თითოეული მოკავშირე პრეზიდენტ დონალდ ტრამპის პოლიტიკის მიმართ, სანამ ალიანსის დაცვისთვის განკუთვნილი ამერიკული სამხედრო შესაძლებლობების შემცირებას დაიწყებს. ინფორმაციას Bloomberg-ი ავრცელებს.
დოკუმენტში, რომელიც ცოტა ხნის წინ ნატოს წევრ ქვეყნებს გაეგზავნა და რომელიც Bloomberg-მა მოიპოვა, აშშ მოკავშირეებს არაერთ კითხვას უსვამს, რათა შეაფასოს მათი მხარდაჭერა პრეზიდენტის მიდგომების მიმართ. მაგალითად, ერთ-ერთ კითხვაში ნათქვამია: იყო თუ არა ქვეყანა აშშ-ის საგარეო პოლიტიკის „საჯაროდ მხარდამჭერი“? რა „შეზღუდვები“ დაუწესა ქვეყანამ აშშ-ის სამხედრო ძალებს მის ბაზებზე გამოყენების კუთხით?
დოკუმენტი ასევე ცდილობს შეაფასოს, ხარჯავენ თუ არა ქვეყნები ფულს აშშ-ის თავდაცვის კომპანიებზე. მათ ასევე ეკითხებიან, ჰქონდათ თუ არა მათ „საჯაროდ წინააღმდეგობა გამოხატული ისეთი რეგულაციების მიმართ“, რომლებიც ამერიკულ კომპანიებთან კონტრაქტების გაფორმებას „აფერხებს“. საბოლოოდ, კითხვარში დასმულია მთავარი კითხვა: „აჩვენა თუ არა ქვეყანამ აშშ-ის მიდგომასთან – „ძლიერი, მკაფიო და მშვიდი“ – შესაბამისობა?“ ეს ფრაზა თავდაცვის მდივნის პიტ ჰეგსეტის ერთ-ერთ განცხადებას უკავშირდება.
საქმეში ჩახედული პირების განცხადებით, რომლებიც საკითხის კონფიდენციალურობის გამო ანონიმურობის პირობით საუბრობენ, მოკავშირეები ამ ნაბიჯით უკმაყოფილონი არიან და მას აშშ-ის დაცვის სანაცვლოდ იდეოლოგიური თანხვედრის მისაღწევად მათზე ზეწოლის მცდელობად აღიქვამენ.
ამერიკის ხანგრძლივი უსაფრთხოების ვალდებულებების ასეთ ერთგულებაზე მიბმა შეცვლიდა მეორე მსოფლიო ომის შემდეგ ჩამოყალიბებულ ტრანსატლანტიკურ ურთიერთობას, რომელიც აშშ-ის სამხედრო გარანტიებზე იყო დაფუძნებული და მრავალი პოლიტიკური უთანხმოება ამ გარანტიებზე მაღლა იდგა.
უკვე ცნობილია, რომ ტრამპის გუნდმა სცადა მემარჯვენე ძალების გაძლიერება ისეთ ქვეყნებში, როგორიცაა გერმანია და უნგრეთი, ხოლო პოლონეთში მისთვის სასურველი კანდიდატის პრეზიდენტად არჩევის შემდეგ ვარშავისთვის დამატებითი სამხედრო ძალების გაგზავნა შესთავაზა.
კითხვარი ტრამპის ადმინისტრაციის მიერ ევროპის კონტინენტზე აშშ-ის სამხედრო ყოფნის ექვსთვიანი გადახედვის დაწყებიდან რამდენიმე კვირის შემდეგ გავრცელდა. პროცესი დეკემბრისთვის უნდა დასრულდეს. ნატოს მოკავშირეები უკვე ემზადებიან ამერიკული მხარდაჭერის მნიშვნელოვანი შემცირებისთვის, მათ შორის ევროპაში განლაგებული ამერიკელი სამხედროების რაოდენობისა და იმ სამხედრო შესაძლებლობების შემცირებისთვის, რომელთა გამოყენებასაც აშშ მოკავშირეზე თავდასხმის შემთხვევაში გეგმავდა, წერს სააგენტო.