ევროკომისიამ დაადასტურა, რომ ივლისის ბოლოს სეუტაში მიგრანტების მასობრივი შემოდინების შემდეგ უკანონოდ დარჩენილ ყველა ადამიანს სამშობლოში დააბრუნებენ. ინფორმაციას „ევრონიუსი” ავრცელებს.
ევროკომისიის წარმომადგენელმა, მარკუს ლამერტმა აღნიშნა, რომ მიგრანტების დაბრუნება ევროკავშირის კანონმდებლობით არის გათვალისწინებული. მისი თქმით, ამ პროცესს ამჟამად არეგულირებს „დაბრუნების დირექტივა“, ხოლო მალე მას ასევე დაარეგულირებს ევროკავშირის „დაბრუნების რეგულაცია“.
მისივე განცხადებით, კანონმდებლობა ითვალისწინებს სეუტაში უკანონოდ მყოფი მიგრანტების, მათ შორის, თანმხლები პირების გარეშე მყოფი არასრულწლოვნების დაბრუნებასაც.
გასულ კვირას ესპანეთის შინაგან საქმეთა მინისტრმა, ფერნანდო გრანდე-მარლასკამ განაცხადა, რომ სეუტაში დაახლოებით 5 000 უკანონო მიგრანტი რჩებოდა, მათ შორის 1898 არასრულწლოვანი. ესპანეთის ხელისუფლებამ პირობა დადო, რომ სეუტაში უკანონოდ მყოფ ყველა ადამიანს წარმოშობის ქვეყანაში დააბრუნებს.
თვის დასაწყისში მაროკოს ხელისუფლებამ განაცხადა, რომ მზად არის, ითანამშრომლოს ესპანეთთან და ევროკავშირის სხვა პარტნიორებთან თანმხლები პირების გარეშე მყოფი მიგრანტების დაბრუნების ხელშესაწყობად.
ევროკომისიის წარმომადგენლის თქმით, მიგრანტების კონტრაბანდასთან დაკავშირებული რამდენიმე ანგარიში უკვე დაიხურა.
ცნობისთვის, ესპანეთის მონაცემებით, 30 ივლისიდან, რამდენიმე დღის განმავლობაში მაროკოდან ესპანურ ანკლავ სეუტაში დაახლოებით 72 000 ადამიანი გადავიდა.