ირანის პარლამენტის სპიკერი და ქვეყნის მთავარი მოლაპარაკებელი, მუჰამედ ბაღერ ყალიბაფი აშშ-ის ხაზინის მდივნის, სკოტ ბესენტის მუქარას გამოეხმაურა და განაცხადა, რომ შეერთებულ შტატებს სხვა ქვეყნებისთვის შეზღუდვების დაწესების ეკონომიკური შესაძლებლობა არ გააჩნია.
ბესენტი მანამდე იმ ქვეყნების დასჯით დაიმუქრა, რომლებიც ირანთან ეკონომიკურ კავშირებს ინარჩუნებენ.
„ამერიკელებმა იციან, რომ მათ მუქარას არავინ აღიქვამს სერიოზულად. ეკონომიკური თვალსაზრისით, შეერთებული შტატები არ იმყოფება იმ პოზიციაში, რომ სხვა ქვეყნებთან ურთიერთობები კიდევ უფრო შეზღუდოს“, – აღნიშნა ყალიბაფმა.
ირანის საკანონმდებლო ორგანოს ხელმძღვანელმა სოციალურ ქსელ X-ში დაწერა, რომ თეირანის სავაჭრო პარტნიორები ვაშინგტონის გაფრთხილებებს უგულებელყოფენ.
„ირანის პარტნიორებმა, როგორც საჯაროდ, ისე ჩვენთვის გამოგზავნილ პირად გზავნილებში, მკაფიოდ დააფიქსირეს, რომ ამ განცხადებებს არანაირ მნიშვნელობას არ ანიჭებენ“, – დასძინა ყალიბაფმა.