აშშ-ის პრეზიდენტის სპეციალური წარმომადგენლები სტივ უიტკოფი და ჯარედ კუშნერი კრემლში ვლადიმერ პუტინს შეხვდნენ.
რუსული მედიის ცნობით, მოლაპარაკებებში ასევე მონაწილეობდნენ რუსეთის პრეზიდენტის თანაშემწე იური უშაკოვი და რუსეთის პრეზიდენტის სპეციალური წარმომადგენელი და რუსეთის პირდაპირი ინვესტიციების ფონდის ხელმძღვანელი კირილ დმიტრიევი.
მედიის ინფორმაციით, შეხვედრის დროს ვლადიმერ პუტინმა სამშვიდობო მოლაპარაკებებს „რთული“ უწოდა.
რუსული მედიის ცნობით, ქვეყნის პრეზიდენტმა ხაზგასმით აღნიშნა, რომ რუსეთი ყველაფერს გააკეთებს უკრაინის სამშვიდობო მოლაპარაკებებისა და მათში მონაწილე შუამავლების უსაფრთხოების უზრუნველსაყოფად.
ამასთან, პუტინის თქმით, „უიტკოფთან და კუშნერთან თანამშრომლობისას რუსეთი თავს კომფორტულად გრძნობს“.
„ნებისმიერ შემთხვევაში, რა თქმა უნდა, რაც არ უნდა მოხდეს შემდეგ, ამ ტიპის კონტაქტები ყოველთვის სასარგებლოა. აქ, რა თქმა უნდა, ძალიან მნიშვნელოვანია მედიაციის ხარისხი და ჩართული მხარეების ნდობა. მინდა, გითხრათ, რომ ჩვენ კომფორტულად ვგრძნობთ თავს ერთად მუშაობით“, – განაცხადა რუსეთის ლიდერმა უიტკოფთან და კუშნერთან შეხვედრაზე.
რუსული მედია წერს, რომ სტივ უიტკოფმა ვლადიმერ პუტინს აშშ-ის პრეზიდენტ დონალდ ტრამპის საუკეთესო სურვილები გადასცა.
„პრეზიდენტმა ტრამპმა მთხოვა, გადმომეცა მისი საუკეთესო სურვილები“, – განაცხადა უიტკოფმა პუტინთან მოლაპარაკებების დაწყებისას.