ახალი კვლევის თანახმად, ბრიტანელთა უმრავლესობა მიიჩნევს, რომ მთავრობა მხოლოდ იმ სიტყვის თავისუფლებას იცავს, რომელიც მისთვის მისაღებია. ინფორმაციას The Independent-ი ავრცელებს.
ადამიანის უფლებათა ორგანიზაცია Liberty-ის დაკვეთით, კვლევითმა ორგანიზაცია More in Common-ის ჩატარებულმა გამოკითხვამ აჩვენა, რომ ბრიტანელთა 54% მიიჩნევს, რომ მთავრობა მხოლოდ იმ მოსაზრებებს იცავს, რომლებსაც თავად ეთანხმება.
კვლევის შედეგები მას შემდეგ გამოქვეყნდა, რაც პოლიციამ სადავოდ აკრძალული ჯგუფის Palestine Action-ის მხარდამჭერები დააკავა. ისინი ლივერპულში, „ლეიბორისტული პარტიის“ კონფერენციის მიმდებარე ტერიტორიაზე საპროტესტო აქციას მართავდნენ.
Liberty-მ განაცხადა, რომ ეს პრემიერ-მინისტრ ენდი ბერნემისთვის „ძალიან მკაფიო გამაფრთხილებელი ნიშანია“ და ქვეყანაში სიტყვის თავისუფლების კანონების „ორმაგი სტანდარტით აღსრულების“ შესახებ ბრალდებებს აძლიერებს.
სიტყვის თავისუფლების საკითხი ბერნემის წინამორბედ კირ სტარმერის პრემიერ-მინისტრობის პერიოდშიც ერთ-ერთ მწვავე თემად იქცა. სტარმერს „ორი სტანდარტის კირის“ მეტსახელი შეარქვეს იმის გამო, რომ არსებობდა მოსაზრება, თითქოს სოციალურ ქსელებს ძირითადად პოლიტიკური მემარჯვენეების წინააღმდეგ აკონტროლებდნენ, წერს გამოცემა.
Liberty-მ კვლევის შედეგებს „ღრმად შემაშფოთებელი“ უწოდა. ორგანიზაციის განცხადებით, გამოკითხვის მიხედვით, სიტყვის თავისუფლების ყველაზე მნიშვნელოვანი ასპექტი, რომელსაც ბრიტანელები აფასებენ, არის მთავრობისა და ხელისუფლებაში მყოფ პირთა კრიტიკის შესაძლებლობა.
Liberty-ის შეფასებით, კვლევის შედეგებზე გავლენა მოახდინა მთავრობის მიერ სიტყვის თავისუფლებასთან დაკავშირებით მიღებულმა არაერთმა გახმაურებულმა გადაწყვეტილებამ.