მეგა-შოუ “ცეკვავენ ვარსკვლავები“ ფინალისკენ მიდის. კონკურსში ოთხი წყვილი დარჩა, მათ შორის არის მსახიობი ჯანო იზორია, რომელიც პროექტის დაწყებიდან ერთ-ერთ ლიდერად ითვლება.
ვის მიიჩნევს მთავარ კონკურენტად და ვისთან ერთად ისურვებდა ფინალში ყოფნას, ამ და სხვა საინტერესო თემებზე ჯანო იზორია “ეტანიუსს” ესაუბრა.
“ცეკვავენ ვარსკვლავები” ჩემი საოცნებო პროექტი იყო. ბავშობიდან მიყვარდა ცეკვა, ვაწყობდი კონცერტებს და ა.შ. სიმღერაც მეხერხება, მაგრამ ისე არა, რომ “ჯეოსტარში”, ან “ახალ ხმაში” მიმეღო მონაწილეობა – ამას არასოდეს არ ვიზამ.
ყველაფერი კი ასე დაიწყო, მოსკოვში კინო ფესტივალზე ვიმყოფებოდი, სადაც თან მახლდნენ მეგობრები მათ შორის, გიორგი მასხულია, რომელთან ერთადაც “კომაში” ვთამაშობ.
ფესტივალის დასრულების შემდეგ, ნიკიტა მიხალკოვმა წვეულება მოაწყო, სადაც ვხედავდი, რომ არავინ ცეკავდა – ავდექი გავედი საცეკვაოდ და მთელი ნახევარი მოსკოვი ავიყოლიე. ამ დროს ჩემმა მეგობრებმა მითხრეს, რომ აუცილებლად მაცეკვებდნენ “ცეკვავენ ვარსკვლავებში”.
მეუბნებოდნენ, რომ ყველანაირად უნდა მეცადა, მაგრამ საიდან როდესაც პროექტს “ცეკვავენ ვარსკვლავები” ჰქვია?!
რეპეტიციების დროს, როდესაც ჩვენ ვარსკვლავებს გვიწოდებენ, ცოტა მეუხერხულება ხოლმე, ვარსკლავობამდე დიდი გზა უნდა გაიარო. სესილია თაყაიშვილი ნამდვილი ვარსკვლავია და კიდევ ბევრი სხვა ცნობილი მსახიობი. აი, მე კი, ვარსკვლავობამდე დიდი გზა მაქვს გასავლელი.
სულ ვფიქრობდი, რომელი ცნობილი სახე მე ვარ, რომ ამ პროექტში ვიყო. ფოთში ვიყავი, როდესაც დუტამ დამირეკა და მითხრა, რომ “იმედში” უნდა მოხვიდეო. მივედი თუ არა დუტამ მეგრულად მითხრა, რომ იცეკვებო და ასე დავიწყე ცეკვა.
– მეწყვილეზე რას იტყვით, როგორ შეეწყვეთ კარინას?
კარინა არის სასწაული გოგო. ჩვენ ვმეგობრობთ, ძალიან კარგი ადამიანია, პროფესიონალია თავის საქმეში. ადამიანურად ყველაფერს ითვალისწინებს. შვილის შეძენის შემდეგ, როცა რეპეტიციაზე მივედი, მითხრა, თვალები დახუჭეო და სიმბოლურად ორი მატყუარა სოსკა მაჩუქა.
სხვათაშორის, ჩემი პატარა ევა მარტო მის ნაჩუქარ სოსკას ეკარება. რა თქმა უნდა, პროფესიონალია. სულ ვეუბნები რომ ჩვენს ქალაქებს შეხება აქვს-თქო, რადგან ფოთში 30-40 პროცენტი მისი ქალაქიდან ზაპოროჟიიდან ცხოვრობდნენ.
– სანამ გაიგებდით, რომ კარინასთან ერთად იცეკვებდით, ვისთან გსურდათ ცეკვა?
კარინა არც წარმომედგინა. თუ არ იქნებოდა კარენა, ცოცხალი თავით არ დავუთმობდი არავის ჟულიანა ბარგნარს. თუმცა, შემხვდა უმაგრესი მეწყვილე.
– ამ დროის განმავლობაში ცეკვის მხრივ რა სირთულეები შეგხვდათ, რამდენად რთულია?
ძალიან რთული აღმოჩნდა. ყველა ცეკვას თავისი ტერმინი აქვს, ზოგგან გამართული ფეხია საჭირო, ზოგგან პირიქით. არავის ეგონოს ცეკვა ფაფის ჭამა.
– ჟიურზე რას იტყვით და თვით გოჩა ჩერტკოევზე, რომელიც საკმაოდ მკაცრია…
გოჩა ძალიან მაგარი ადამიანია, მიუხედავად იმისა, რომ ხალხი ამბობს, რას გერჩის და ა.შ. არაფერს არ მერჩის, პირიქით რჩევებს მაძლევს, რომელსაც ვითვალისწინებ. გოჩას მიმართ არანაირი აგრესია არ მაქვს. პროექტი როდესაც დაიწყო, თავიდან მისგან ძალიან კარგ შეფასებებს ვიღებდი. ბოლო ლაივზე ათიანი დაგვიწერა და პირველადაც მე დავაწერინე ათიანი ქართულ ტურში.
– გამორჩეული ტური რომელი იყო?
გამორჩეული ტური ბიოგრაფიის ტური იყო, როდესაც ჩემი მეგობრის, რუსლანის ამბავი ვიცეკვე, ასევე “ფოქსტრორტი”, როდესაც ორთან ერთად ვიცეკვე. თუმცა მაინც გამოვყოფ ბიოგრაფიის ტურს.
– ოთხეულში ხართ…ვინ მიგაჩნიათ მთავარ კონკურენტად?
პროექტის დაწყებიდან ყველა კონკურენტია. კონკურსი სიუპრიზებით არის სავსე. არ იცი რა დროს განვითარდება ადამიანი, არ იცი რა ცეკვა წაუვა კარგად. ამიტომ, ვერ გამოვარჩევ ვერავის. ოთხნი დავრჩით და ყველას თავისი კოზირი აქვს, რომელიც შეიძლება მე არ მქონდეს, შეიძლება მე მქონდეს ისეთი რამ, რომელიც მათ არ აქვთ. მაგრამ ეს იმას არ ნიშნავს რომ გავბოროტდით, ერთმანეთთან ძალიან მეგობრული ურთიერთობა გვაქვს.
– იმ შემთხვევაში თუ ფინალში გახვედით, ვის ისურვებდით კონკურენტად?
ამაზე არ მიფიქრია. ბრძოლა რომ ნახოს ხალხმა, მაგ მხრივ, ალბათ, სტასს. თან მისი ფანები მლანძღავენ.
თუმცა ვისურვებდი, რომ მანქანაც და ბინაც ქართველმა მოიგოს.
მკითხევლმა ეს როგორც უნდა ისე გამიგოს..
სტანისლავის გულშემატკივარს მინდა თქვენი მეშვეობით მივმართო, ბოლო ლაივზე, როდესაც ვსაუბრობდით კონკურენტის პლიუსებზე და მინუსებზე, სტასის პლიუსი რა არისო მკითხეს და ვთქვი, რომ ერი გიჟდება მასზე. ცუდი რა ვთქვი, არ გიჟდებიან?!
– პროექტი ფინალისკენ მიდის, რა ხდება შიდა სამზარეულოში, რამდენად დაიძაბა ურთიერთობები?
ძალიან სუფთა ურთიერთობები გვაქვს. სხვათა შორის, მე და გენადიევიჩი (სტანისლავ ბონდარენკო) ვმეგობროთ და მინდა, როგორც ჩემს ისევე, სტასის გულშემატკივარს მივმართო, რომ ნუ გაბოროტდებიან.
– კარიერაში თუ გაქვთ რაიმე სიახლე..
იყო ძალიან კარგი სიახლე, მაგრამ არჩევანის წინაშე ვიდექი, ან კინო ან “ცეკვავენ ვარსკვლავები”. ცოტა გულისტკენად დამყვება ეს ამბავი, მაგრამ არაუშავს. უკვე პროექტში ვიყავი, როდესაც ფილმის გადაღებებზე დამიძახეს, მაგრამ ამ ამბავმა ჩაიარა.
– ფოთის თეატრის მსახიობი ხართ, თუმცა ხალხმა კინოდან გაგიცნოთ, უფრო კი, სერიალ “ტიფლისიდან”. რომელი უფრო არის თქვენთან ახლოს კინო, თუ თეატრი?
ამ შავ ყუთს დიდი ძალა აქვს. ტელევიზია ისეთი რამ არის, წკაპ და უცბად ადამიანი ცნობილი ხდება. არიან თეატრის მსახიობები, რომლებზეც წარმოდგენა არა აქვთ.
“ტიფლისი” სისტემატურად გადიოდა. ბევრ კარგ მხატრულ ფილმში ვარ გადაღებული, უბრალპდ ყველა თვალს მასიურად ვერ ადევნებს. კინოში როდესაც გადის ფილმი, იქ ვერ მიდიან ძვირი ღირს, ტელევიზიამ შეიძლება წელიწადში ერთხელ გაუშვას.
– სად უფრო რთულია მუშაობა კინოში, თუ თეატრში?
ორივეგან. სხვათაშორის ამ კითხვას ასე ვუყურებ, ბავშობაში როდესაც მეკითხებოდნენ მამა გიყვარს, თუ დედაო? ასე რომ ჩემთვის ორივე რთულია. კინოში გამძლეობა უნდა გქონდეს, ჯანმრთელობა, რადგან შეიძლება გადაღება მოგიწიოს ყინვაში, გაუსაძლის პირობებში. თეატრიც რთულია – ჰამლეტის, მეფე ლირის როლი უნდა დაიზეპირო, შემდეგ გახვიდე და ისე უნდა ითამაშო, რომ მაყურებელი გადარიო.
– როლი, რომელიც ძალიან გინდათ რომ ითამაშოთ…
საოცნებო როლი არასოდეს მქონია. რაც მითამაშია და რასაც მათამაშებენ ქვეცნობიერად ყველა ჩემი ოცნება იყო. როლი ყველაზე კარგი მაშინ არის, როდესაც ზუსტად გაქვს მორგებული. სხვა საქმეს მე ვერასოდეს ვერ ავირჩევ, თუნდაც სახლიდან გამაგდონ, შეიძლება ვიცხოვრო მინდორში, მაგრამ ამ საქმეს ვერ შევეშვები.
– სამომავლო გეგმებზე რას იტყვით?
“ცეკვავენ ვარსკვლავების“ შემდეგ ერთი ხუთი დღე დავისვენებ, შემდეგ თეატრს დავუბრუნდები. ასევე მინდა აფხაზეთშიც გადავიდე და ჩემები მოვინახულო.
წყარო: movlenebi.ge