რუსეთის ქალაქ სურგუტში მომხდარ თავდასხმაზე პასუხისმგებლობა ტერორისტულმა დაჯგუფება “ისლამურმა სახელმწიფომ” აიღო. ინფორმაციას სააგენტო Reuters დაჯგუფების მებრძოლებთან დაკავშირებულ სააგენტო Amaq-ზე დაყრდნობით ავრცელებს.
მანამდე ცნობილი გახდა, რომ თავდასხმა 1994 წელს დაბადებულმა ადგილობრივმა მკვიდრმა განახორციელა, რომელიც სავარაუდოდ, ფსიქიკურად იყო ავად. ანონიმური წყაროების მიხედვით, ის ცენტრალური აზიის მკვიდრი, ბობიჩე აბდურახმანოვია.
ცნობისთვის, 19 აგვისტოს, დილით რუსეთის ქალაქ სურგუტში ცივი იარაღით შეიარაღებული უცნობი პირი გამვლელებს თავს დაესხა, რის შედეგადაც 8 ადამიანი დაშავდა. ინციდენტის ადგილზე პოლიციის თანამშრომლებმა თავდამსხმელის ლიკვიდაცია განახორციელეს. დაშავებულებს სხვადასხვა სიმძიმის დაზიანებები აღენიშნებათ. ისინი საავადმყოფოში გადაიყვანეს. 4 მათგანი მძიმე მდგომარეობაშია.