პოლიტიკოსი ირინა სარიშვილი, თავისი შვილების შესახებ სოციალურ ქსელში მორიგ დადებით პოსტს ავრცელებს.
“მარტო ვართ ეხლა მე და პატარები სახლში. ვუყურებ როგორ ჭყავიან, მხიარულობენ და არ იძინებენ და სიზმარში მგონია თავი. თითქოს ახალი არაფერი ხდება – მე ასე ვცხოვრობ 20 წელზე მეტია, მაგრამ მაშინ პოლიტიკა მართმევდა დიდ დროს, რაც ბავშვებისთვის უნდა დამეთმო (ამაზე უახლოეს დღეებში დავწერ), არც ასე ყოველდღიურად საჯარო იყო ჩემი ცხოვრება (მადლობა ფეისბუკს), თან ჩემმა ოთხმა პატარა მზემ – გიორგიმ, სანდრომ, ბარბარემ და მარიამმა სხვანაირად გაანათა ჩვენი ცხოვრება და ჩემი უფროსი ბიჭებიც სულ სხვანაირად დამანახა – ეს რა ადამიანები გაზრდილან, კაცები, ვისი იმედიც უბრალოდ ქუჩაში გამვლელსაც უნდა ჰქონდეს.
იმდენი სასწაული ხდება ყოველდღიურად ჩვენთან, ყველაფერს ვერც გადავიღებ და ვერც დავწერ.
სასწაულია როგორ უვლიან და თავს ევლებიან პატარებს ლუკა, ირაკლი და საბა.
სასწაულია, როგორ ეხმარებიან ერთმანეთს ბარბარე და მარიამი – ორივეს ღრძილები ექავება და ერთმანეთს უდებენ პირში პატარა თითებს.
სასწაულია როგორ ელოდება სანდრო, როგორც არ უნდა შიოდეს ან წყუროდეს, თავის დებს, სანამ ისინი შეჭამენ ან დალევენ.
სასწაულია როგორ ტიტინებენ გოგოები ერთმანეთში და როგორ აყვა მათ სანდროც, რომელიც ცოტა ხანში დარწმუნებული ვარ დაილაპარაკებს.
სასწაულია უამრავი ადამიანის, მათ შორის უცნობების დამოკიდებულება ჩემი ოჯახის მიმართ, როგორ ეფერებიან დიდებსაც და პატარებსაც.
სასწაულია ასეთ მძიმე ყოფაში ამდენი ადამიანის მათ შორის უცნობების მხრიდან სრულიად უანგაროდ გაწვდილი ხელი ერთმანეთისთვის სიტყვით, სხვა რამით, რა მნიშვნელობა აქვს…
ყველაფერს მოვერევით, გულის მანკსაც, გულის მრავლობით პათოლოგიებს, უკიდურესად დაბალ ტონუსს, ნაღვლის ბუშტის, თირკმელების პრობლემებს, ჩიყვს და კიდევ შესაძლოა სხვა პრობლემებს, რაც შეიძლება აღმოჩნდეს სამივესთან.
მოვერევით აბა რას ვიზამთ და დღეს თუ არა ხვალ გავივლით, დავილაპარაკებთ და ძალიან ჭკვიანები, ლამაზები და ყველაზე კეთილები ვიქნებით!
ასე იქნება ყველაფერი იმიტომ რომ ზღაპარში ვართ”, – წერს ირინა სარიშვილი.