“პატრიოტთა ალიანსის” თბილისის მერობის კანდიდატი ირმა ინაშვილი მიიჩნევს, რომ “ქართული ოცნების” თბილისის მერობის კანდიდატი კახა კალაძე არა მარტო დამოუკიდებელ კანდიდატს ალექსანდრე ელისაშვილს, არამედ ყველა კანდიდატს უნდა შეხვდეს.
“კახი კალაძის პასუხი ჩემთვის გასაგები და მისაღებია. მეც იგივე კითხვა მაქვს: რატომ უნდა მიიღოს კალაძემ დებატებში მხოლოდ ელისაშვილის გამოწვევა? რითაა ელისაშვილი აღმატებული სხვა კანდიდატებზე? ბურთს კარგად კენწლავს? ჩვენ კარგად ვმღერით და ვცეკვავთ…
🙂 ეს რა კრიტერიუმია? ქვეყნის მასშტაბითაც გაცილებით მეტი ადამიანი გვიჭერს მხარს. ეს კი, კრიტერიუმი ნამდვილადაა..
თბილისის მერობის კანდიდატთა ნაწილი საკუთარ რეიტინგს სარეკლამო რგოლებზე „ფეისბუქში“ დაფიქსირებული „მოწონებებით“ ითვლის, რისი ყიდვაც მარტივად შეიძლება და რაც კონკრეტული კანდიდატის რეიტინგზე რეალურად სულაც არ მეტყველებს. ამ ხერხს ფსიქოლოგიური დატვირთვა აქვს, რომ სოციოლოგიური კვლევის მეთოდოლოგიაში კომპეტენტურად ვერგარკვეულ „ფეისბუქელებს“ აფიქრებინოს, თითქოს N- კანდიდატს თბილისის მოსახლეობის 80%-ი უჭერს მხარს. სინამდვილეში უნიკალური მხარდამჭერის დაფიქსირების ყველაზე ობიექტური და რეალური გზა,- ესაა: რამდენი მხარდამჭერი დაუდგება გვერდში კონკრეტულ კანდიდატს არა „ფეისბუქში“, არამედ გარე არენაზე, ანუ ქუჩაში ორგანიზებულ შეკრებაზე. რატომ აქვს ამას მნიშვნელობა? პარტიაც, საზოგადოებაც ცხადად ხედავს, რამდენი ადამიანი არ ერიდება მხარდაჭერის ღიად დაფიქსირებას; ამას განსაკუთრებული დატვირთვა აქვს ოპოზიციური პარტიებისა და კანდიდატებისათვის, რომელთა ამომრჩევლებიც ხშირად ერიდებიან საჯარო მხარდაჭერის გამოხატვას. მითუმეტეს, აქციის, მანიფესტაციის ფორმატში.
პირდაპირ ვამბობ: თბილისის მერობის წამოდგენილი კანდიდატებიდან მხოლოდ 2 კანდიდატს აქვს რესურსი, რომ უნიკალური მხარდამჭერების რაოდენობა ქუჩაში აჩვენოს. ერთი ესაა სახელისუფლებო პარტიის კანდიდატი კახი კალაძე და მეორე ვართ ჩვენ- „საქართველო პატრიოტთა ალიანსი“. არც ერთ სხვა კანდიდატს, იქნება ეს ზაალ უდუმაშვილი, უპარტიო ალექსანდრე ელისაშვილი თუ პარტიული ელენე ხოშტარია არა აქვს პოტენციალი,- ღია ცის ქვეშ 1000 კაცზე მეტს მოუხმოს და თუ აქვთ, მაშინ ჩემი შეთავაზებაა, გვაჩვენონ ეს! გვაჩვენონ არა „ფეისბუქის“ „ლაიქებით“, არამედ ღია ცის ქვეშ სწორედ უნიკალური მხარდამჭერების შეკრების გზით.
ფაქტია, ამას ვერავინ გაქცევა. თბილისში „პატრიოტთა ალიანსის“ აქციაზე ათასობით მხარდამჭერი შეიკრიბა. ეს ათასობით მხარდამჭერი პარტიისა და ჩემი ამომრჩეველია. ნაციონალური მოძრაობის აქციის მონაწილეთა რაოდენობა მერიის წინ ვიხილეთ, სულ 100 კაცამდე! 50-80-100 კაცი იკრიბება სხვა კანდიდატების შეხვედრებზე. ამ ფონზე ვხედავთ, რომ ელისაშვილი კალაძეს იწვევს დებატებში, ხოლო კალაძე პრაქტიკულად უდუმაშვილს აღიარებს მთავარ კონკურენტად.
ვეხმაურები კახი კალაძის დღევანდელ განცხადებას საერთო დებატების ორგანიზების შესახებ. მზად ვარ, ერთიან ფორმატში (ყველა კანდიდატთან) მივიღო დებატებში მონაწილეობა. ასევე, მნიშვნელოვანია ინიციატივა, რომ ეს დებატები ყველა არხმა ერთდროულად გააშუქოს, რომ გამოირიცხოს მედიისადმი შერჩევითი მიდგომა. მიმაჩნია, რომ ზოგიერთი კანდიდატის მხრიდან საკუთარი რეიტინგის გაზვიადების მანია აშკარად ცდება ჯანსაღი თვითშეფასების ფარგლებს. ეს კი, დასაბალანსებელია სწორედ საჯარო დებატების გზით. დიდი იმედი მაქვს, რომ თბილისის საზოგადოება ამ კანდიდატთა შორის ახალი ტიპის სააკაშვილებსაც უდაოდ შეიცნობს და თბილისის აღმშენებლობაზე მოსაუბრე თამარ ჩერგოლეიშვილებსაც, რომლებმაც ხელისუფლებაში ყოფნის დროს თავად შეჭამეს და მოკლეს თბილისი. ამიტომ კალაძის პასუხი ჩემთვის გასაგები და მისაღებია. მეც იგივე კითხვა მაქვს: რატომ უნდა მიიღოს კალაძემ დებატებში მხოლოდ ელისაშვილის გამოწვევა? რითაა ელისაშვილი აღმატებული სხვა კანდიდატებზე? ბურთს კარგად კენწლავს? ჩვენ კარგად ვმღერით და ვცეკვავთ….