მამუკა მდინარაძე – პრეზიდენტის ადმინისტრაციამ სტრატეგიული შეცდომა დაუშვა

„პრეზიდენტის ადმინისტრაციამ სტრატეგიული შეცდომა დაუშვა“, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ პრეზიდენტის შესაძლო ვეტოსთან დაკავშირებით კომენტირებისას განაცხადა.
მამუკა მდინარაძე მიიჩნევს, რომ ვენეციის კომისიამ საბოლოო გადაწყვეტილებით, კონსტიტუციასთან დაკავშირებით პოლიტიკურ სპეკულაციებს წერტილი დაუსვა.
მისივე თქმით, ვენეციის კომისიამ ერთხელ დაადასტურა, რომ საქართველომ პროგრესული და დემოკრატიული კონსტიტუცია შექმნა. პარლამენტის წევრი აღნიშნავს, რომ თუ პრეზიდენტისა და მისი ადმინისტრაციის პასუხი საბოლოოა, მათ ამ გადაწყვეტილებით, იურიდიულის გარდა, რამდენიმე სტრატეგიული შეცდომა დაუშვეს. „პრეზიდენტმა ორ საკითხთან დაკავშირებული საყოველთაო კონსენსუსის რეალიზებაზე უარი თქვა, რომელსაც ვენეციის კომისიაც ეთანხმება. ორი საათის განმავლობაში, პრეზიდენტი კონსტიტუციის მხარდაჭერის შესახებ უმრავლესობის წევრებისა და ამავდროულად, ხუთი პარტიის ლიდერების სხვადასხვა მოსაზრებებს ისმენდა, დღეს კი, მისი წარმომადგენლები კვლავ აცხადებენ, რომ ერთპარტიული კონსტიტუცია მივიღეთ. ეს კიდევ ერთხელ ადასტურებს, რომ ისინი საზოგადოებას კონსტიტუციის შესახებ არასწორ ინფორმაციას აწვდიან“, – აღნიშნავს მდინარაძე.