ეს სკანდალური ამბავი თბილისის ერთ-ერთ უბანში მოხდა, თუმცა საქმის დელიკატურობიდან და არასრულწლოვანთა ინტერესებიდან გამომდინარე, ჩვენ არც ამ ისტორიის ფიგურანტებს და არც დანაშაულის ადგილმდებარეობას არ დავაკონკრეტებთ.
„პრაიმტაიმი“, ისევე როგორც სხვა მედიასაშუალებები, არაერთხელ წერდა არასრულწლოვანზე მომხდარი სექსუალური ძალადობის, გაუპატიურებისა და გარყვნილი ქმედების შემზარავი ფაქტების შესახებ. საქართველო, ამ მხრივ, გამონაკლისი არ არის და, ცხადია, მსგავსი ტიპის დანაშაული სხვა ქვეყნებშიც საკმაოდ ხშირია, თუმცა ფსიქოლოგებს თუ დავუჯერებთ, სინამდვილეში ბევრად უფრო მეტ ასეთ შემთხვევას აქვს ადგილი, ვიდრე საზოგადოებისთვის ხდება ცნობილი. ხშირად ოჯახებს ურჩევნიათ, მომხდარი არ გაახმაურონ, ან თავად ძალადობის მსხვერპლი ბავშვები ინახავენ მას საიდუმლოდ.
ამბავი, რომლის შესახებაც ახლა უნდა გიამბოთ, გამონაკლისია, რადგან დაზარალებულმა არასრულწლოვანმა მომხდარის შესახებ დედას დეტალურად უამბო, მშობელმა კი საქმეში სამართალდამცავი ორგანოები ჩაერთო.
როგორც „პრაიმტაიმს“ ოჯახის ახლობელმა უამბო, დაზარალებული გოგონა შვიდი წლის არის. ვინაიდან ის პირველი კლასის მოსწავლეა, მშობლებმა სასწავლო პროგრამის უკეთ ათვისების მიზნით რეპეტიტორს მიაბარეს. ამ მიზნით კი მათ მეზობლად მცხოვრები ახალგაზრდა ქალი შეარჩიეს, რომელიც დაწყებითი კლასის მოსწავლეებს სახლში ამეცადინებდა.
„რამდენიმე დღეში ბავშვი შეშინებული მივიდა დედასთან და ყველაფერი უამბო. არ მინდა დაკონკრეტება, მაგრამ ბავშვი ჰყვება, როგორ ეხებოდა ეს მანიაკი და თავად ბავშვსაც როგორ სთხოვდა იგივეს გაკეთებას. ძალიან შეგნებული ოჯახია და სწორადაც მოიქცნენ, რომ პოლიცია გამოიძახეს. დაიწყო გამოძიება, ბავშვი მშობლის თანდასწრებით დაკითხეს და ის ყველაფერს მოჰყვა. ღმერთმა გადმოგვხედა, რომ უფრო შორს არ შეტოპა იმ არაკაცმა. ბავშვს ექსპერტიზა ჩაუტარდა და გაუპატიურების ფაქტი, საბედნიეროდ, არ დადასტურდა. ოჯახმა ძალიან დიდი შოკი მიიღო, ბავშვიც რა მდგომარეობაში იყო, ხომ წარმოგიდგენიათ?!“ – ამბობს ოჯახის ახლობელი.
მისივე ინფორმაციით, გამოძიება სხვა ფაქტების გამოკვეთასაც აქტიურად ცდილობს, ვინაიდან შესაძლოა, საქმეში სხვა დაზარალებულებიც გამოიკვეთონ.
„ეს რეპეტიტორი ახალგაზრდა გოგოა, რა თქმა უნდა, არ იცოდა, მისი ქმარი რას სჩადიოდა. თავადაც შოკში იყო გოგო. გამომძიებლებმა დაკითხეს. ის სხვა ბავშვებსაც ამზადებდა დაწყებით საგნებში. როდესაც ეს ბავშვი მათთან სახლში მიდიოდა და მასწავლებელს სხვა მოსწავლე ჰყავდა, ბავშვი სხვა ოთახში ელოდებოდა მას და როგორც ჰყვება, სწორედ ამ დროს ხდებოდა ეს ყველაფერი. 25 წლამდე ბიჭია თვითონაც, არ ვიცი, რა ავადმყოფობა სჭირს ასეთი. როგორც გვითხრეს, გამოძიება სხვა შემთხვევებსაც იკვლევს, რადგან არსებობს ეჭვი, რომ იგივეს სხვა ბავშვების მიმართაც აკეთებდა. გავიგეთ, რომ რამდენიმე ბავშვის მშობელი უკვე დაკითხეს კიდეც“.
მომხდარის შესახებ ინფორმაცია „პრაიმტაიმს“ შინაგან საქმეთა სამინისტროშიც დაუდასტურეს. უწყებაში განგვიმარტეს, რომ ბრალდებულის სახით ახალგაზრდა მამაკაცი 21 სექტემბერს დააკავეს. მომხდართან დაკავშირებით გამოძიება სისხლის სამართლის კოდექსის 141-ე მუხლით მიმდინარეობს, რაც არასრულწლოვნის მიმართ გარყვნილ ქმედებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე ანდა თავისუფლების აღკვეთით ვადით ორ წლამდე. იმ შემთხვევაში, თუ საქმეში სხვა დაზარალებულებიც გამოიკვეთებიან, დიდი ალბათობით, დაკავებულს ბრალი დაუმძიმდება, წინააღმდეგ შემთხვევაში კი არსებული კანონმდებლობით, შესაძლოა, ის მხოლოდ ფულადი ჯარიმის სანაცვლოდ გაათავისუფლონ.
ფსიქოლოგები ამბობენ, რომ ბავშვზე, ან მოზარდზე განხორციელებული ძალადობის ფაქტების დროულად აღმოჩენას და სწორ რეაგირებას დიდი მნიშვნელობა აქვს მათი კეთილდღეობისა და ძალადობის უარყოფითი გავლენის თავიდან ასაცილებლად. ორგანიზაცია „საქართველოს ბავშვები“ მშობლებს სპეციალურ რეკომენდაციებსაც სთავაზობს:
1. იყავით ფხიზლად. არ დატოვოთ ბავშვი სანდო მეთვალყურის გარეშე. თუ რაიმე საეჭვოს შეამჩნევთ ბავშვის გარემოცვაში, ან ბავშვს შეატყობთ მნიშვნელოვან ცვლილებებს ქცევებისა და ემოციების თვალსაზრისით, მაშინვე შეეცადეთ გარკვევას, რა მოხდა და მიიღეთ შესაბამისი ზომები;
2. ყურადღებით მოუსმინეთ ბავშვს, თუ ის რაიმეს გიყვებათ ძალადობის შესახებ, მაგრამ არ დააძალოთ მოყოლა, ბავშვისთვის შეიძლება მტკივნეული იყოს ძალადობის გამოცდილებაზე საუბარი;
3. შეეცადეთ, აკონტროლოთ საკუთარი ემოციები და ქცევები. თქვენთვის მტკივნეული იქნება ბავშვთან მიმართებაში განხორციელებული ძალადობის ფაქტის გაგება, მაგრამ არ „ჩავარდეთ პანიკაში“, მოახდინეთ საკუთარი თავის მობილიზება ბავშვისთვის დახმარების აღმოსაჩენად;
4. დაუკავშირდით სამართალდამცავ ორგანოებს და დეტალურად მიაწოდეთ თქვენს ხელთ არსებული ინფორმაცია;
5. უზრუნველყავით ბავშვის უსაფრთხოება, უპირველეს ყოვლისა, მოარიდეთ მოძალადეს;
6. ბავშვს/მოზარდს აღმოუჩინეთ ემოციური მხარდაჭერა, აგრძნობინეთ, რომ მის გვერდით ხართ და იზრუნებთ მასზე. არ დაადანაშაულოთ ბავშვი მომხდარში, მიუთითეთ, რომ მისი მხრიდან მომხდარის შესახებ თქვენთვის ინფორმაციის მოყოლა სწორი საქციელია;
7. დაიცავით კონფიდენციალობა. ეცადეთ, მომხდარი მოვლენა არ გახდეს ღია, საჯარო განხილვის საგანი, ინფორმაცია მიაწოდეთ მხოლოდ შესაბამის სპეციალისტებსა და იმ პირებს, რომლებიც ბავშვის კეთილდღეობასა და უსაფრთხოებაზე არიან პასუხისმგებელნი. თუ მედია აპირებს ფაქტის გაშუქებას, კატეგორიულად მოითხოვეთ, რომ დაფარული იყოს ბავშვის/მოზარდის შესახებ საიდენტიფიკაციო ინფორმაცია (სახელი, გვარი, სახე, საცხოვრებელი ადგილის მისამართი და ა.შ.);
8. მიმართეთ სპეციალისტებს – სამედიცინო პერსონალს, ფსიქოლოგს, რათა დროულად მოხდეს ძალადობის პირველადი შედეგების შეფასება და საჭიროების გამოკვეთის შემთხვევაში ბავშვს/მოზარდს გაეწიოს შესაბამისი დახმარება შემდგომი სამედიცინო და ფსიქოლოგიური გართულებების თავიდან აცილების მიზნით.
www.primetime.ge