კახა კალაძე: 21 ოქტომბრის შემდეგ დავიწყებთ მიწისქვეშა პარკინგის პროექტის განხორციელებას

“ქართული ოცნება-დემოკრატიული საქართველოს” თბილისის მერობის კანდიდატმა, კახა კალაძემ, ტელეკომპანია “იმედის” ეთერში, გადაცემაში “ამომრჩევლის პირისპირ” მიწისქვეშა პარკინგის შესახებ ისაუბრა.
როგორც მან განაცხადა, პუშკინის სკვერის მიმდებარე პარკინგი 125 მანქანაზე იქნება გათვლილი და დედაქალაქის მოსახლეობას მოემსახურება.
“თბილისის მერიას ათი ლოკაცია აქვს შერჩეული სადაც მიწისქვეშა პარკინგი უნდა მოეწყოს. შესაბამისად, 21 ოქტომბრის შემდეგ ჩვენ დავიწყებთ ამ პროექტის განხორციელებას.
რაც შეეხება პუშკინის სკვერის მიმდებარე პარკინგს, რომელზეც ბოლო დღეებში აქტიურად ვისმენთ, თითქოს ერთ ლარად გადაეცა კონკრეტულ კომპანიას, მილიონ ლარზე მეტი ინვესტიცია უნდა განხორციელდეს. ეს არის მიწისქვეშა პარკინგი და დაახლოებით 125 მანქანაზე იქნება გათვლილი”, – აღნიშნა კალაძემ.