თანაინვესტირების ფონდი თავისუფლების მოედანზე 160 ავტომანქანისთვის განკუთვნილი ავტოსადგომის მოწყობის სქემას განმარტავს და ფოტომასალას ავრცელებს

საქართველოს თანაინვესტირების ფონდი თავისუფლების მოედანზე 160 ავტომანქანისთვის განკუთვნილი ავტოსადგომის მოწყობის სქემას განმარტავს და შესაბამის ფოტომასალას ავრცელებს.
ფონდის სამეთვალყურეო საბჭოს თავმჯდომარე ირაკლი ქარსელაძე ასევე ეხმაურება პარკირების სივრცის საჯაროობასთან დაკავშირებით დასმულ კითხვებს და აცხადებს, რომ პარკინგით სარგებლობა ნებისმიერ ადამიანს შეეძლება.
მისი განმარტებით, თავისუფლების მოედანთან მშენებარე 7-ვარსკვლავიანი სასტუმრო კომპლექსის წითელ ხაზებში უკვე მოწყობილია 80 ავტომანქანაზე გათვლილი ავტოსადგომი; (ფოტო1).
ქარსელაძის ინფორმაციითვე, გარდა ამისა, საინვესტიციო ვალდებულებით გადასაცემი ტერიტორიის ქვეშ, შესაძლებელია 40 ავტომანქანაზე გათვლილი მიწისქვეშა ავტოსადგომის მოწყობა, მაგრამ ფონდი ასახელებს ავტომანქანების მინიმალურ რაოდენობას – 30-ს. (ფოტო2).
როგორც თანაინვესტირების ფონდის სამეთვალყურეო საბჭოს თავმჯდომარე აცხადებს, მიწისქვეშა ავტოსადგომების გარდა, მოეწყობა მიწისზედა ავტოსადგომი, რომელიც სულ მცირე, 40 ავტომანქანაზე იქნება გათვლილი (ფოტო3).
„შესაბამისად, ჯამურად, მიწისქვეშა და მიწისზედა ავტოსადგომები 160 ავტომობილს დაიტევს. რაც შეეხება თავისუფლების მოედანზე მშენებარე 7-ვარსკვლავიან სასტუმროს, თავად ეს მასშტაბური პროექტი და ინვესტიცია უპრეცედენტო მოვლენაა ჩვენი დედაქალაქისთვის. სასტუმრო კომპლექსი, რომელიც მოიცავს საბაგირო სადგურს, საკონფერენციო სივრცეს ორი სხვადასხვა კონცეფციით, სპორტულ-გამაჯანსაღებელ ცენტრებს, A კლასის საოფისე ფართებს, რესტორნებს, ბარებს და სხვადასხვა დასასვენებელ თუ გასართობ ატრაქციას, ეს აბსოლუტურად საჯარო სივრცეა და, რა თქმა უნდა, ავტოსადგომით სარგებლობაც ნებისმიერ მსურველს შეეძლება. აღნიშნული პროექტის განხორციელებით, პირველ რიგში დედაქალაქი და მისი მოსახლეობა უპრეცედენტო საზოგადოებრივ სივრცეს შეიძენს“, – განაცხადა ირაკლი ქარსელაძემ.