სიტყვიერი და ფიზიკური დაპირისპირება მთაწმინდის პარკის მიმდებარე ტერიტორიაზე მოხდა. ინფორმაციას სააგენტო „პირველი“ ავრცელებს. მედიის ცნობით, ადგილობრივები რუს ტურისტებს დაუპირისპირდნენ, შემდეგ კი მათი ავტომობილი დააზიანეს.
შინაგან საქმეთა სამინისტროს ინფორმაციით, დაკითხულია ინციდენტში მონაწილე ყველა პირი. შედგენილია შესაბამისი ოქმები და მიმდინარეობს საგამოძიებო მოქმედებები.
„ექსპერტიზა ჩატარებულია ავტომანქანაზე, გასაუბრების ოქმებიც შედგა, დადგენილია ინციდენტში მონაწილე პირების ვინაობა. მეორე მხარემ, ვისაც ავტომობილი დაუზიანეს, განაცხადა, რომ ვერ მიიღებდა საგამოძიებო მოქმედებებში მონაწილეობას, რადგან დღეს უნდა დატოვოს საქართველოს საზღვარი. ის აცხადებს, რომ პრეტენზია არ აქვს, თუმცა, ამის მიუხედავად, საგამოძიებო მოქმედებები გრძელდება“, – აცხადებენ შსს-ში.