ზურაბ ადეიშვილისა და დავით ჭაკუას საქმეზე სასჯელაღსრულების დეპარტამენტის ყოფილი თანამშრომელი ბორის ფარულავა, მეტსახელად “ბასტი” იკითხება. მოწმემ დეტალურად გაიხსენა 2011 წლის 17 სექტემბერი და განაცხადა, რომ პატიმრების წამებისა და ე.წ. კარანტინის დაშლის კადრები მისი გადაღებულია. ინფორმაციას 1tv ავრცელებს.
“ყველა კადრთან კავშირი მე არ მაქვს, მაგრამ იყო ფაქტები, რაშიც მაქვს მონაწილეობა მიღებული. მე ვხედავდი ცუდი მოპყრობის ფაქტებს. ვიფიქრე, რომ რაღაცის შეცვლა იქნებოდა კარგი და გარკვეული პირების დახმარებით ვიღებდი ვიდეოებს, ფარული მოწყობილობა მომაწოდა გიორგი ლომიამ. ასევე შეხება მქონდა ვლადიმერ ბედუკაძესთან. ანუ იყვნენ პიროვნებები, რომლებიც ამ მოპყრობას აპროტესტებდნენ. იმ მომენტში სისტემა რომ შეცვლილიყო, გავერთიანდით ლომია, ბედუკაძე, დათა აკობია და მე”, -განაცხადა მოწმემ.
მისივე თქმით, გადაღებულ კადრებში ასახულია პატიმრების მასობრივი ცემა, ასევე, როგორ აიძულებდნენ პატიმრებს, აგენტები გამხდარიყვნენ. როგორც მოწმემ აღნიშნა, გადაღებას ე.წ. ღილი-კამერითა და კალმით ახორციელებდა. მან ხაზი გაუსვა, რომ არანაირი შეხება ოპოციურ პარტიებთან არ ჰქონია.
“ჩვენ არ გვქონია შეხება ოპიზიციურ პარტიებთან, არც ანაზღაურება მიგვიღია ამაში. პატიმრების ცემაში მონაწილეობდნენ ხელმძღვანელი პირები, გაგა მკურნალიძე ვიცი, სხვისი სახელები არა”, – აღნიშნა მოწმემ.
სახელმწიფო ბრალდება იუსტიციის ყოფილ მინისტრ ზურაბ ადეიშვილსა და სასჯელაღსრულების დეპარტამენტის ყოფილ თავმჯდომარეს დავით ჭაკუას რამდენიმე მუხლს – უფლებამოსილების გადამეტებას, თანამდებობის ბოროტად გამოყენებას, მტკიცებულებათა ფალსიფიკაციას, პატიმრების წამებასა და ძალადობას ედავება.