პარიზში და პარიზის გარეუბანში ორგანიზებულ დანაშაულთან ბრძოლის ცენტრალურმა სამმართველომ 35 კაციანი ჯგუფი დააკავა, რომელთა შორისაც ე.წ. კანონიერი ქურდები არიან. ამის შესახებ ფრანგული მედია იუწყება, თუმცა საგამოძიებო ორგანო დაკავებულთა ვინაობებს არ ასაჯაროებს.
“პრაიმტაიმისთვის” კი ცნობილი გახდა, რომ დაკავებულ “კანონიერ ქურდებს” შორის არიან:
36 წლის ნოდარ გაბისონია და 37 წლის გიორგი ფოლადაშვილი, რომელსაც კრიმინალურ წრეებში “სინკარას” მეტსახელით იცნობენ.
ორივე მათგანი “კანონიერ ქურდად” 2013 წელს თურქეთში “მონათლეს”.
ასევე დაკავებულია 38 წლის რემი დარახველიძე, რომელმაც “კანონიერი ქურდის” სტატუსი 2000 წელს, თბილისში მიიღო. სხვადასხვა დროს დაპატიმრებული იყო საქართველოში, უკრაინასა და სომხეთში.
ფოტოზე მარჯვნიდან პირველი გახლავთ რევი დარახველიძე, შუაში ვალერი სილაგაძე (“ვალერა სოხუმსკი”) და გიორგი ფოლადაშვილი (“სინკარა”).
სპეცოპერაციის შედეგად ასევე დაკავებულია კიდევ რამდენიმე “კანონიერი ქურდი” და მათთან დაკავშირებული დაჯგუფების წევრები.
საფრანგეთის პოლიციის ინფორმაციით, დანაშაულებრივი ჯგუფი დაკავებული იყო ბინების გაქურდვით, ქურდობითა და სიგარეტის კონტრაბანდით.
აღნიშნულ დანაშაულებრივ ჯგუფთან დაკავშირებით გამოძიება ორი წლის განმავლობაში მიმდინარეობდა, რომელშიც ასევე იყო ჩართული საფრანგეთში საქართველოს საელჩო, ევროპოლი და ინტერპოლი.
გავრცელებული ინფორმაციით, 35 დაკავებულიდან 8 ქალია, ძირითადად ქართველები. დაკავებისას პოლიციელებმა 70 ათასი ევრო, იარაღი, მანქანები და 200 ათასი ევროს ღირებულების ქონება ამოიღეს.