უკრაინის პრეზიდენტის, ვოლოდიმირ ზელენსკის განცხადებით, თურქულ გემზე, რომელსაც მარცვლეული გადაჰქონდა, ორი რუსული დრონით თავდასხმა განხორციელდა. მისი თქმით, გემს ნეიტრალურ წყლებში სიმინდი გადაჰქონდა, როდესაც მასზე დარტყმა განხორციელდა.
„ნეიტრალურ წყლებში სამოქალაქო გემზე, რომელსაც სიმინდი გადაჰქონდა და რომელიც თურქეთს ეკუთვნოდა, ორი რუსული დრონით საშინელი დარტყმა განხორციელდა. გემზე აზერბაიჯანისა და ინდოეთის მოქალაქეები იმყოფებოდნენ“, – განაცხადა უკრაინის პრეზიდენტმა.
როგორც ვოლოდიმირ ზელენსკი აღნიშნავს, ამ დროისთვის ცნობილია, რომ გემის კაპიტანი დაიღუპა, ხოლო კიდევ ერთი ადამიანის მდგომარეობა დგინდება. მისივე თქმით, ეკიპაჟის 11 წევრის გადარჩენა მოხერხდა, თუმცა ერთ-ერთი მათგანი დაშავებულია.
„უკრაინას უკვე არაერთხელ შეუთავაზებია კონკრეტული ნაბიჯები დეესკალაციისა და შავ ზღვაში უსაფრთხოების უზრუნველყოფის მიზნით. შესაბამისი წინადადებები მესამე ქვეყნების მხრიდანაც იყო. თუმცა, რუსეთი ნორმალური ნავიგაციის ნაცვლად, მუდმივად ტერორსა და სამოქალაქო გემების ჩაძირვას ირჩევს. აუცილებელია ზეწოლის განხორციელება, რათა გლობალური სასურსათო უსაფრთხოება აღდგეს. და ყველამ, ვინც ამით ნამდვილად დაინტერესებულია, ამ პროცესში თავისი წვლილი უნდა შეიტანოს“, – აღნიშნა უკრაინის პრეზიდენტმა.
მანამდე „როიტერმა“ რუმინეთის ხელისუფლებაზე დაყრდნობით გაავრცელა ინფორმაცია იმის შესახებ, რომ შავ ზღვაში, რუმინეთის ტერიტორიული წყლების მიღმა, თურქულ გემზე გაჩენილი ხანძრის შედეგად ორი ადამიანი დაიღუპა, 11-ის გადაარჩენა კი მოხერხდა. რუმინეთის შინაგან საქმეთა სამინისტროს ინფორმაციით, გემი ჩაძირვის საფრთხის წინაშე იყო.