პოლიტოლოგ რამაზ საყვარელიძის განცხადებით, კორცხელში მომხდარი ინციდენტი ალბათ ერთ-ერთი ის მნიშვნელოვანი ფაქტორი იქნება, რომელიც სამომავლო არჩევნებზე გარკვეულ გავლენას იქონიებს.
როგორც საყვარელიძემ გაზეთ „რეზონანსთან“ ინტერვიუში განაცხადა, ამ ინციდენტმა ბევრი რამ ცხადი გახადა.
„ცხადი გახდა, რომ “ნაციონალური მოძრაობა” აქტიურ ბრძოლას გააგრძელებს. ასევე ცხადი გახდა, რომ შეიძლება “ქართულმა ოცნებამ” ადეკვატური ნაბიჯების გადადგმა ვერ მოახერხოს ამ ბრძოლაში. ვნახეთ, რომ “ოცნება” შექმნილ ინციდენტს მოუმზადებელი შეხვდა. ეს ყველაფერი მიუთითებს იმას, რომ პრაქტიკულად 2016 წლის არჩევნებში, შესაძლოა, აღმოვჩნდეთ იგივე ალტერნატივის წინაშე, რის წინაშეც 2012-ში ვიყავით. 2012 წელს მოქმედებდა ის ფაქტორი, რომ ხალხს მიაჩნდა, რომ ივანიშვილის გუნდი პრობლემებს მოაგვარებდა, ამ გუნდთან დაკავშირებით ოპტიმიზი იყო. დღეს ალბათ ხალხი უნდა მიხვდეს, რომ მომავალში როგორ საქართველოში იცხოვრებენ, ეს ხალხის საქმეა და მათი გადასაწყვეტია. ამ მიმართულებით ბრძოლა არ დამთავრებულა, შეიძლება ითქვას, ახლა იწყება. ეს თვალსაჩინოდ გამოჩნდა კორცხელის ინციდენტში.
რაც შეეხება დაპირისპირებებს, ის რა თქმა უნდა, იქნება და უნდა იყოს კიდეც, ეს პოლიტიკაა და არა კეთილშობილ ქალთა ინსტიტუტი. დაპირისპირება უნდა იყოს. ყველა მოქალაქე ვალდებულია გააცნობიეროს, რომ მისი პასუხისმგებლობაა, უახლოესი პერიოდის საქართველო სად და როგორ იცხოვრებს“ – აცხადებს პოლიტოლოგი.