საკონსტიტუციო სასამართლოს გადაწყვეტილება გამოცხადებისთანავე სასამართლოს ვებ-გვერდზე გამოქვეყნდება და ძალაში შევა, – ამის შესახებ “საკონსტიტუციო სასამართლოს შესახებ“ კანონში დაგეგმილ ცვლილებებთან დაკავშირებით ადამიანის უფლებათა დაცვის კომიტეტის თავმჯდომარე ეკა ბესელია აცხადებს. როგორც ბესელია განმარტავს, პროექტში პრინციპული ცვლილებები განხორციელდა და კომპრომისული ვერსიები აისახა.
დეპუტატის განმარტებით, საკონსტიტუციო სასამართლოს გადაწყვეტილება “საკანონმდებლო მაცნეში“ აღარ გამოქვეყნდება. “პირველი მნიშვნელოვანი საკითხი, რაც ჩვენ პირველი მოსმენის შემდეგ გავიზიარეთ, ეხება იმას, თუ როდიდან შევა ძალაში საკონსტიტუციო სასამართლოს გადაწყვეტილება – “საკანონმდებლო მაცნეში“ უნდა გამოქვეყნდეს ის, თუ სასამართლოს ვებ-გვერდზე აიტვირთოს. ჩვენ გავიზიარეთ სასამართლოს მიერ შემოთავაზებული პოზიცია – გადაწყვეტილება გამოცხადებისთანავე სრულად გამოცხადდება, მას ყველა მოსამართლე მოაწერს ხელს და სასამართლოს ვებ-გვერდზე დაიდება. ამის შემდეგ შევა ის ძალაში. ეს არის კომპრომისული ვერსია. კომპრომისული ვერსიაა ისიც, რომ მოსამართლეებს, რომლებსაც უფლებამოსილების 10-წლიანი ვადა გასდით, ბოლო სამ თვეში გარდა იმ საქმეებისა, რაც მათ აწერიათ და უნდა დაასრულონ, ახალი საქმეების განხილვის შესაძლებლობა ექნებათ თუ არა. საკონსტიტუციო სასამართლო ითხოვდა, რომ ამ მოსამართლეებმა არჩევნებთან და რეფერენდუმთან დაკავშირებული საკითხები განიხილონ. ჩვენ კომპრომისული ვერსია მივიღეთ და შევთანხმდით, რომ მათ დარჩენილ ვადაში ეს მოკლევადიანი სარჩელები განიხილონ, მაგრამ საბოლოო გადაწყვეტილება პლენუმმა მიიღოს“, – განმარტა ეკა ბესელიამ.
ამასთან, დეპუტატის ცნობით, “საკონსტიტუციო სასამართლოს შესახებ“ კანონში დაგეგმილი ცვლილებები ვენეციის კომისიას გაეგზავნება.