თბილისის მერი კახა კალაძე გუდიაშვილის მოედნის სარეაბილიტაციო სამუშაოებზე ოპოზიციის შენიშვნებს, ასე პასუხობს; – ტყუილი და სიცრუეა მათი განცხდებები იმასთან დაკავშირებით, რომ თითქოს პირდაპირი შესყიდვა განხორციელდა. ეს იყო გამარტივებული შესყიდვა, სადაც კონკრეტულ პროექტზე ჩატარდა სამხარაულის ექსპერტიზა, თანხობრივად შეფასდა პროექტი, გამოცხადდა ინტერესთა გამოხატვა, შეირჩა რამდენიმე კომპანია.
ოპოზიციის შენიშვნები ქალაქის მერისთვის მიუღებელია.
“ძალიან მნიშვნელოვანი პროექტის განხორციელებას ვიწყებთ და მინდა ყველა იმ ადამიანს მადლობა გადავუხადო, ვინც წლების განმავლობაში იცავდა ამ კონკრეტულ მოედანს, შენობა-ნაგებობებს. ეს არის ის სიმდიდრე, რომელიც ჩვენს ქალაქს გააჩნია, ეს არის ისტორიული ძველი თბილისი. ძალიან მალე ეს იქნება ერთ-ერთი საუკეთესო ადგილი – განახლებული გუდიაშვილი შენობა-ნაგებობებით. არ ვაპირებთ აქ გაჩერებას, ვაპირებთ მომდევნო წლების განმავლობაში გავზარდოთ რეაბილიტაციის მასშტაბები. 500 მილიონი ლარის დახარჯვას ვაპირებთ მომდევნო წლების განმავლობაში. ეს არის ის, რაც ახალ სიცოცხლეს აძლევს ქალაქს. მნიშვნელოვანია იმ თვალსაზრისითაც, რომ აქ მცხოვრები ადამიანების ეკონომიკური მდგომარეობა უმჯობესდება დღეს თუ მათი ფართი, ულტრირებას ვუკეთებ, ღირს 100 ლარი, რეაბილიტაციის შემდეგ ორჯერ და სამჯერ მეტი ეღირება. ჩვენი ქალაქი ძალიან მალე იქნება სიცოცხლით სავსე ქალაქი, სიყვარულით და სიკეთით სავსე. რაც შეხება ოპოზიციის შენიშვნებს, ამას ნამდვილად ვერ მივიღებთ. კიდევ ერთხელ მინდა ვთქვა რომ ტყუილი და სიცრუეა მათი განცხდებები იმასთან დაკავშირებით, რომ თითქოს პირდაპირი შესყიდვა განხორციელდა. ეს იყო გამარტივებული შესყიდვა, სადაც კონკრეტულ პროექტზე ჩატარდა სამხარაულის ექსპერტიზა, თანხობრივად შეფასდა პროექტი. გამოცხადდა ინტერესთა გამოხატვა, შეირჩა რამდენიმე კომპანია, რომლებისგანაც მივიღეთ ფასები და ყველაზე საუკეთესო და დიდ კომპანიებს მიეცათ შესაძლებლობა განახორციელონ ასეთი მნიშვნელოვანი და დიდი პროექტი”, – განაცხადა კალაძემ.
მისივე თქმით, ვისაც სურვილი აქვს ხელოვნებათმცოდნეებს, რესტავრატორებს ჩაერთონ მონიტორინგის პროცესში, შეუძლიათ ჩაერთონ.
“ჩემთვის და ჩემი თანაგუნდელებისთვის მნიშვნელოვანია, რომ ის სიმდიდრე, რაც თითოეულ ორნამენტშია, თითოეულ აივანზე, თუნდაც შესასვლელ კარზეა შენარჩუნდეს. “იკომოსი” უწევს ზედამხედველობას ამ სამუშაოებს და დამატებით თუ იქნება სურვილი ჩართულობის, პრობლემა არ იქნება. ამისთვის თბილისის მერია მზად არის”, – განაცხადა კალაძემ.