შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა შინდისში რუსეთ-საქართველოს ომის დროს დაღუპულ გმირებს პატივს მიაგო.
„დღეს 9 აპრილია, საქართველოს უახლეს ისტორიაში ერთ-ერთი უმძიმესი თარიღი, როდესაც ჩვენი ბავშვები, ქალები, მამაკაცები საქართველოს თავისუფლების წინააღმდეგ ამხედრებულ ჯალათებს შეეწირნენ ჩვენი დედაქალაქის შუაგულში და ასევე მინდა, დღეს მათ სახელებს პატივი მივაგოთ. ეს არის ძალიან ტრაგიკული დღეები, მაგრამ ამავდროულად, 9 აპრილი, ისევე, როგორც შინდისის გმირობა, არის არნახული ერთსულოვნების და თავდადების სიმბოლო. ზუსტად ასეთი ერთსულოვნებით, ოღონდ მშვიდობით, რათა აღარ დაიღვაროს ჩვენი რჩეულების სისხლი, უნდა ვიბძოლოთ ჩვენი თავისუფლებისა და დამოუკიდებლობისთვის“, – განაცხადა ციხელაშვილმა.
ამასთან, მან აღდგომის დღესასწაული მიულოცა ყველას, განსაკუთრებით იმ ადამიანებს, ვისაც დღეს მავთულხლართების და სხვადასხვა ხელოვნური დაბრკოლების გამო ექმნება პრობლემა, რომ თავისი ნათესავები მოინახულოს, სალოცავებში მივიდეს, ახლობლების სასაფლაოებზე გადავიდეს.
„მინდა ვუსურვო მათ, რომ მალე გვეცხოვროს საქართველოში მავთულხლართების გარეშე. ეს აუცილებლად იქნება მიღწეული და ამ დღეს უნდა ვისურვოთ, რომ შერიგებით, ნდობით, შენდობით და უკეთეს მომავალზე ფიქრით გადავდგათ ნაბიჯები, რომლებიც აუცილებელია იმისთვის, რომ ჩვენმა შვილებმა თავისუფალ გარემოში იცხოვრონ და არ ჰქონდეთ მსგავსი პრობლემები, როგორსაც დღეს ადამიანები მავთულხლართების გასწვრივ აწყდებიან“, – განაცხადა სახელმწიფო მინისტრმა.
ქეთევან ციხელაშვილი შინდისში ქალაქ გორის მერთან, კონსტანტინე თავზარაშვილთან და ადგილობრივი ხელისუფლების წარმომადგენლებთან ერთან იმყოფებოდა. ოფიციალურმა პირებმა გმირების მემორიალი გვირგვინებით შეამკეს.