ბარნოვზე მოკლული 25 წლის გოგოს მამა, ზვიად გამრეკელაშვილი შვილის მკვლელისთვის სამუდამო პატიმრობის მოითხოვს.
ზვიად გამრეკელაშვილი ამბობს, რომ მისთვის განსაზღვრული წლების მისჯა ნიშნავს იმას, რომ მკვლელი გათავისუფლების შემდეგ ისევ იძალადებს სხვაზე. ამის შესახებ გამრეკელაშვილმა TV პირველი-ს ეთერში, გადაცემა „რეაქციაში” ისაუბრა.
„ჩვენი, ოჯახის წევრებისა და ჩვენი ახლობლების მოთხოვნა არაა უბრალოდ გამწარებული ადამიანების მოთხოვნა და აკვიატება. ყველაზე გამართლებულია, მიესაჯოს უვადო პატიმრობა. ის რომ წლების შემდეგ გაათავისუფლონ, ისევ უნდა იაროს, იწანწალოს შეურაცხადმა ადამიანმა გარეთ და ისევ ვიღაც უნდა გაამწაროს. ცოფიანი ძაღლისგანაც თავს შორს იჭერენ და მკვლელ ადამიანს სამუდამო უნდა მიესაჯოს. ის კაცი უბრალოდ ცოლების კოლექციას აგროვებდა და თავის ჭკუაზე მართავდა მათ”, – თქვა მოკლული გოგოს მამამ.
ზვიად გამრეკელაშვილმა წლების წინ დაკავებული ვეფხია ბაქრაძის პრეზიდენტის მიერ შეწყალებაზეც ისაუბრა:
„ვფიქრობ, თაკოს დედამ შიშის გამო მოაწერა ხელი ამ კაცის შეწყალებაზე. ჩემი აზრით ის შვილის გადარჩენაზე ფიქრობდა. თუ პრეზიდენტი ფიქრობს, რომ შეწყალებისას სწორად მოიქცა, მაშინ ვიცი როგორ სასჯელს გამოიტანს სახელმწიფო. გამოდის, რაც ახლა ხდება, – ეს მხოლოდ ყურის საამებლადაა” – თქვა გამრეკელაშვილმა.
მოკლულის მამამ მოკლული გოგოს იმ ორ მცირეწლოვან შვილზე ისაუბრა, რომლებიც დედის მკვლელობას შეესწრნენ:
„ძალიან გვინდა ვეკონტაქტოთ ბავშვებს, მაგრამ ვშიშობთ. ვფიქრობთ, მეტად დახვეწილია მათთან ფსიქოლოგების მუშაობა” – თქვა მოკლული თაკო გამრეკელაშვილის მამამ.