თბილისის მერია ახალი ინფრასტრუქტურული პროექტების განხორციელებას იწყებს

თბილისის მერია ბარათაშვილის აღმართისა და კოსტავას ქუჩის რეაბილიტაციას, ასევე ვაშლიჯვრის ესტაკადის მშენებლობას ზაფხულში დაიწყებს. ამის შესახებ დედაქალაქის მერმა კახა კალაძემ განაცხადა.
“პეტრიწის ქუჩაზე დავიწყეთ გზის სარეაბილიტაციო სამუშაოები. მიმდინარეობს კომუნიკაციების გამოცვლა, სანიაღვრე სისტემის მოწესრიგება. ჩვენთან ერთად მუშაობს „ჯორჯიან უოთერ ენდ ფაუერი“. მოწესრიგდება ბორდიურები და გზაგამყოფები, რომელიც ძალიან მძიმე მდგომარეობაშია და ფაქტობრივად, პარკინგისთვის იყო გამოყენებული. გამწვანდება ქუჩა და მოეწყობა ინფრასტრუქტურა ეტლით მოსარგებლე ადამიანებისთვის. ასევე ვაპირებთ ბარათაშვილის აღმართის სრულ რეაბილიტაციას, მალე დავიწყებთ ვაშლიჯვრის გადასასვლელი ესტაკადის მშენებლობას. ასევე დაგეგმილი გვაქვს კოსტავას ქუჩის სრული რეაბილიტაცია. ეს არის მასშტაბური პროექტები, რომლებსაც დავიწყებთ ზაფხულში, რომ ქალაქში კოლაფსი არ გამოვიწვიოთ“,- განაცხადა კალაძემ.